2022-04-20 17:17:58
1/2
Немагчыма паверыць, што гэтаму інтэрвію 8 год. Дакладней тут кавалкі з размовы. У 2014 годзе я працаваў на Польскім радыё і зрабіў інтэрвію з польскім гісторыкам і палітолагам Ежым Таргальскім (памёр летась). Многія кансерватары лічылі яго дужа мудрым чалавекам, лібералы – вар'ятам, я быў недзе пасярэдзіне. Пры ўсёй крытычнасці яго ацэнак да унутрыпольскай сітуацыі, ягоныя меркаванні пра Расею аказаліся вельмі трапнымі. Яшчэ раз, гэта было сказана 8 год таму.
У 1999 годзе Пуцін пачаў сваю аперацыю. Ён вывеў Расею з часоў смуты. Цяпер у яго новыя клопаты. Калі Пуцін не падпарадкуе Еўропу, то праз нейкі час Расея не будзе ўвогуле патрэбная Еўропе. Новыя тэхналогіі, сланцавы газ, нікому ня будзе патрэбная расейская сыравіна. У Пуціна, па-сутнасці, нож на горле. Калі ён цяпер нічога ня зробіць, то заўтра Расея стане энэргетычным дадаткам Кітаю.
Расея імкнецца падпарадкаваць Еўропу, зрабіць яе сваім васалам. Украіна для Расеі з'яўляецца ўсяго інструмэнтам на гэтым шляху. Мэта ў тым, каб Еўропа трывала любыя паводзіны Масквы і такім чынам аддалілася ад Амерыкі. Калі Амерыка будзе настойваць на санкцыях і праводзіць больш рашучую палітыку (сувымерную да сітуацыі, не абсалютную), то Еўропа, найперш Нямеччына, будуць праводзіць прымірэнчую палітыку.
У Беларусі Пуцін можа рабіць усё, што заўгодна, і Еўропа нават пальцам не варухне. Таму Пуцін не мог пачаць ад Беларусі, бо такі канфлікт не выклікаў бы аніякага супраціву, супярэчнасцяў паміж Еўропай і ЗША.
Пуціну патрэбны кантроль выключна на поўдні Ўкраіны. Затым Малдова і Румынія. Пуцін імкнецца да дамінацыі ў басейне Чорнага мора, каб перакрыць любыя пастаўкі сыравіны ў Еўропу з Сярэдняй Азіі праз Каўказ. Без кантролю Адэсы гэта зрабіць цяжка.
Можна змяніць напрамак імпарту газу. З Сярэдняй Азіі, праз Каўказ і Чорнае мора. Беларусь можа стварыць эканамічны шлях са Скандынавіі праз Балтыйска-чарнаморскі мост у Турцыю, на Блізкі Ўсход і Сярэднюю Азію. Павярнуць напрамак эканамічнага абмену. Але для гэтага ёсць адна ўмова — Беларусь і Ўкраіна павінны быць незалежнымі дзяржавамі.
Залежнасць Еўропы ад Расеі азначае манаполію Расеі на транспарт газу з Сярэдняй Азіі. Для гэтага ёй патрэбны і Каўказ, і Ўкраіна, каб Сярэдняя Азія не змагла самастойна экспартаваць газ у Еўропу. Менавіта для гэтага Расеі патрэбны хаўрус з Іранам, таму ЗША хацелі палепшыць адносіны з Іранам. Для таго, каб адблакаваць пастаўкі газу з Азіі. Расея ліквідавала Туркменбашы, які хацеў прадаваць газ за 100 даляраў за тысячу кубаметраў, а Расея давала толькі 60.
Заігрыванне Лукашэнкі з украінцамі (на той момант сустрэча з Турчынавым) ня мае ніякага значэння. Ён кажа Пуціну: я зраблю ўсё, штоты скажаш, толькі пакінь мяне. Але ў Пуціна ёсць свой інтарэс. Пуцін павінен карміць расейцаў тым, што імперыя вяртаецца, што яны моцныя, што яны вернуць Аляску. Гэта хворае грамадства, яно як наркаман, і часам яму трэба даць нарктотык, каб ён канчаткова не звар’яцеў.
Лукашэнка будзе пераконваць беларусаў, што ён незалежны. Але ўсё, што ён кажа, з расейскага пункту гледжання ня мае ніякага значэння. Лукашэнка можа гаварыць, што заўгодна, але я вас магу запэўніць, што нікому на свеце не цікава, што ён думае і што кажа.
У Еўропе ёсць толькі прарасейскія сілы. Альбо левыя, як нямецкая сацыял-дэмакратыя, якія падпяваюць Расеі, альбо правыя, як Марын Лі Пэн, якія імкнуцца ў хаўрусе з Расеяй знішчыць Еўразвяз. Абодва выхады для нас катастрафічныя. Тэтчэр, Адэнаўэр? Былі ды сплылі. Мы жывем у часы распаду цывілізацыі, а Еўропу гэты працэс зачапіў асабліва востра. Еўрапейскія палітыкі сталі вязнямі прагматызму. Калі вы палітык, то вы павінны выйграць выбары, а каб атрымаць большасьць галасоў, то вы не можаце павялічыць беспрацоўя. Калі Аланд хоча мець падтрымку, то ён ніколі ня звольніць 4 тысячы чалавек з заводу, які вырабляе “Містрэль” для Расеі. Гэта, на жаль, мінус дэмакратыі — мы з'яўляемся вязьнямі кепскіх рашэнняў, якія трэба прыняць, інакш мы будзем пенсіянерамі.
975 viewsedited 14:17