BelarusWithUkraine

2022-07-07 13:55:18 "Беларусы змагаліся і працягваюць змагацца, нават калі мы гэтага не бачым"

Наталля Пазняк з Украінскага інстытута нацыянальнай памяці разважае пра тое, што адбываецца паміж украінцамі і беларусамі.

Вось асноўныя тэзісы, але раім прачытаць пост цалкам - дужа карысна.

Раскрутка сварак паміж намі ідзе з-за "поребрика". Мэта - настроіць беларусаў супраць украінцаў і кінуць як гарматнае мяса на новы віток вайны.

Багата беларусаў не ідэнтыфікуюць сябе зараз з Беларуссю. Краіна акупаваная, як у 2014 быў акупаваны Крым.

Беларусы ваююць ва Украіне. Выходзяць на пратэсты. Вядуць рэйкавую вайну, за якую пагражае смяротнае пакаранне.

"Вата" ёсць паўсюль. У Лісічанску радасна сустракаюць "вызваліцеляў". І ў Беларусі ёсць тыя, хто не ўяўляе будучыні без Расіі - гэта "лукашысты" або "ябацькі", але не беларусы.

На ўсіх нашых Майданах луналі бел-чырвона-белыя сцягі. Адным з першых у 2014 загінуў беларус Міхась Жызнеўскі.

Давайце спыняць сваркі. Вайна яшчэ не скончылася - і гэта наша супольная вайна. Адкрыць / каментаваць

2022-07-06 16:27:01 Петыцыя пра тое, каб замежныя добраахвотнікі, якія абараняюць Украіну, маглі атрымліваць грамадзянства ў паскораным рэжыме, менш як за месяц сабрала больш як 25 тысяч подпісаў

Гэта значыць, што Прэзідэнт Украіны мусіць цягам азначанага законам тэрміну разгледзець прапанову пра ўнясенне зменаў у заканадаўства краіны. Гэтыя змены могуць паўплываць на лёсы многіх салдат.

Нагадаем, сёння Украіну абараняе ўжо больш за дзве тысячы беларусаў. Нашы суайчыннікі з першых дзён вайны падтрымалі ўкраінцаў. Аднак, згодна з заканадаўствам, у выпадку, калі вайсковец трапіць у палон, абмен адбываецца з дзяржавай, грамадзянінам якой той з'яўляецца.

Учора стала вядома, што прынамсі два байцы палка імя Каліноўскага цяпер знаходзяцца ў палоне расійскіх агрэсараў. Іх сапраўды могуць выдаць Беларусі, дзе, згодна з Крымінальным кодэксам, палоннаму могуць прысудзіць пажыццёвы срок, а ў самым горшым выпадку яму пагражае смяротнае пакаранне. Адкрыць / каментаваць

2022-07-06 14:36:28 Пад Лісічанскам зніклі шасцёра беларусаў, якія ваявалі на баку Украіны

Падцверджана, што Іван "Брэст" Марчук загінуў.

У расійскіх тэлеграм-каналах з'явіліся відэа з палоннымі Янам "Тромбляй" Дзюрбейкам і Сяргеем "Кляшчом" Дзегцевым.

Паводле апублікаванай расійскімі каналамі інфармацыі, астатнія каліноўцы загінулі. Гэта:

Васіль "Сябро" Парфянкоў
Васіль "Атам" Грудовік
Вадзім "Папік" Шатроў

Радыё Свабода расказвае падрабязнасці і кароткія гісторыі ваяроў. Адкрыць / каментаваць

2022-07-06 13:01:50 Маці ў Беларусі распачалі антываенную акцыю

Каб выказаць свой пратэст, яны пакідаюць цацкі ў людных месцах і побач пішуць, што думаюць пра вайну.

У Беларусі працягваюцца жорсткія рэпрэсіі супраць усіх нязгодных з дзеяннямі рэжыму. Кожны дзень кагосьці кідаюць за краты, звальняюць з працы, запалохваюць. Жанчыны, якія рашыліся на гэтую акцыю, - прыклад адвагі і рашучасці.

Крыніца: Союз матерей Адкрыць / каментаваць

2022-07-06 11:53:19 Тут вы можаце пачуць голас беларускага добраахвотніка Івана "Брэста"

Гэтае інтэрв'ю камандзіра батальёну "Волат" урыўкамі запісвалася за дзень да яго смерці. Іван паспеў адказаць толькі на частку пытанняў, на астатнія абяцаў даць адказ, калі вернецца з баявога задання.

Крыніца: Радыё Свабода - Беларусь Адкрыць / каментаваць

2022-07-06 00:28:42 Ва Украіне загінуў яшчэ адзін беларускі добраахвотнік.
Стала вядома пра смерць Івана Марчука, камандзіра батальёна “Волат” Палка імя Каліноўскага, які меў пазыўны "Брэст".

“Мы яго ведалі як мужнага, рашучага і самаадданага чалавека, які за кожнага свайго байца быў гатовы на ўсё. Брэст меў выключны аўтарытэт сярод ваяроў Палка. Акрамя гэтага ён быў адданым сынам беларускай зямлі і верыў у будучыню вольнай Беларусі”, - напісалі каліноўцы.

Таксама вядома, што яшчэ адзін беларускі баец - Ян "Тромблі" Дзюрбейка трапіў у палон. Адкрыць / каментаваць

2022-07-05 20:05:31 Сябры! Нам вельмі важна разумець, ці карысная для вас інфармацыя, якой мы тут дзелімся з вамі.

Калі ласка, паўдзельнічайце ў нашай апытанцы

Адкрыць / каментаваць

2022-07-05 17:44:00 Падтрымайце фінансавы збор для дзеячоў культуры з Украіны

У сакавіку Беларускі ПЭН разам з Фондам Open Culture, ПЭНам Украіны і Польскім ПЭН-клубам распачалі збор сродкаў, скіраваны на падтрымку ўкраінскіх пісьменнікаў, журналістаў, навукоўцаў, перакладчыкаў і мастакоў, якія знаходзяцца ў небяспецы з-за вайны.

За гэты час сабрана больш за 350 000 PLN (≈74 365 EUR)

Падтрымаць збор Адкрыць / каментаваць

2022-07-05 16:17:50 Беларусы зрабілі фільм-інтэрв'ю з жыхаркай Марыўпалю, у якой разам з дзецьмі атрымалася з'ехаць у Польшчу

Наталля распавяла пра перажытыя жахі вайны: як усё пачыналася, якая атмасфера была ў яе родным горадзе. Гэты шчыры маналог адлюстроўвае стан тых людзей, чыё жыццё так хутка змянілася.

Зараз Наталля з дзецьмі шукае жытло ў Польшчы. На жаль, з гэтым ёсць складанасці. Калі вы можаце дапамагчы - калі ласка, адгукніцеся на пошту info@futurestudy.eu

Глядзець фільм на YouTube

#BelarusWithUkraine Адкрыць / каментаваць

2022-07-05 14:45:00 20-гадовую "тэрарыстку" асудзілі да 6,5 гадоў калоніі

Cтудэнтку з Кіраўска Дануту Пярэдня абвінавацілі ў дзеяннях, накіраваных на прычыненне шкоды нацыянальным інтарэсам Рэспублікі Беларусь і абразе Лукашэнкі. У віну ёй паставілі тое, што яна перапосціла ў адзін з чатаў тэкст, у якім у рэзкай форме крытыкаваліся дзеянні Пуціна і Лукашэнкі па развязванні вайны ва Украіне. Таксама там змяшчаўся заклік да вулічных выступаў і канстатавалася адсутнасць перспектыў у беларускай арміі ў выпадку яе ўступлення ў вайну.

Данута была студэнткай-выдатніцай, аднак адразу пасля ўзбуджэння справы яе адлічылі. 10 чэрвеня КДБ абнавіў спіс "асоб, якія маюць дачыненне да тэрарыстычнай дзейнасці"- туды дадалі 9 чалавек, сярод якіх і Данута.

Крыніца: MAYDAY TEAM Адкрыць / каментаваць