Еўрарадыё | Еврорадио

2023-07-06 21:30:24 Лукашэнка заклапочаны тым, як апошнім часам успрымаюць яго рэжым на Захадзе ў плане страты суб'ектнасці ў адносінах з Масквой. Таму зусім невыпадкова 6 ліпеня заходнія журналісты былі запрошаныя на сустрэчу з ім.

"Лукашэнка хацеў паказаць, што ён — гаспадар становішча, што ён не васал, — кажа ў каментары @euroradio палітычны аглядальнік Арцём Шрайбман. — Спрачаўся з тымі, хто казаў пра суверэнітэт. Казаў, што наконт ядзернай зброі Пуцін з ім параіцца. Хаця ўжо стала ясна, што ён не можа сцвярджаць, што ў яго будзе права гэтую ядзерную зброю выкарыстаць. Ва ўсім намагаўся сябе паказаць суб'ектам. Я ўвогуле думаю, што ўся гэтая канферэнцыя, яна якраз была пра тое, што Лукашэнка спрабуе выкарыстаць сваю ролю ў гэтым вагнераўскім кейсе, каб паказаць рост уласнай значнасці. Прэзентаваць гэта, а таксама ядзерную зброю Захаду, як нейкую прыступку наверх у яго суб'ектнасці". Адкрыць / каментаваць

2023-07-06 20:42:13 За паўгода ў Літву не дазволілі ўезд 800 беларусам і 150 расіянам. Пра гэта паведаміла кіраўніца Дэпартамента міграцыі Эвеліна Гудзінскайце. Літоўскія памежнікі палічылі, што яны ўяўляюць пагрозу для іх краіны.

Яшчэ ў пачатку 2023 года кіраўнік Дэпартамента дзяржбяспекі Літвы Дарус Яўнішкіс казаў, што ў Літву з Беларусі ўязджалі не толькі тыя, каго пераследавалі ўлады, але і агенты КДБ, а таксама людзі, завербаваныя беларускімі сілавікамі. Такую ж небяспеку ўлады Літвы бачаць і цяпер. "Каля нашых межаў могуць з'явіцца ўзброеныя людзі з беларускім грамадзянствам, пад адзеннем якіх будуць хавацца тыя самыя вагнераўцы", — гаварыў нядаўна прэзідэнт Літвы Гітанас Наўседа. Адкрыць / каментаваць

2023-07-06 20:05:17 Розныя крыніцы паведамляюць, што міністр транспарту і камунікацый Беларусі скончыў жыццё самагубствам. Пра раптоўную смерць Аляксея Аўраменкі ў 46 гадоў стала вядома 5 ліпеня. У чацвер BYPOL Аляксандра Азарава са спасылкай на інфармацыю "ад удзельнікаў Плана "Перамога" паведаміў, што Аўраменка насамрэч скончыў жыццё самагубствам. Пры гэтым даных пра прычыну такога ўчынку міністра ў яго няма.

Пазней пра суіцыд, які адбыўся 4 ліпеня, напісала "Наша ніва", якая спасылаецца на свае крыніцы. Аляксей Аўраменка скончыў жыццё самагубствам у гаражы лецішча. Там яго знайшлі сваякі. Адкрыць / каментаваць

2023-07-06 19:30:04 Нацыянальны цэнтр абароны персанальных даных пацвердзіў, што на серверы БДУ была атака. Раней Мінадукацыі гэта адмаўляла, сцвярджала, што адбыўся "тэхнічны збой".

"Паводле інфармацыі Беларускага дзяржаўнага ўніверсітэта, накіраванай у Цэнтр, быў ажыццёўлены несанкцыянаваны доступ да інфармацыйнай сістэмы БДУ, пры якім зламыснікамі былі незаконна атрыманыя персанальныя даныя каля 6 тысяч чалавек, — гаворыцца ў паведамленні Цэнтра абароны персанальных даных. — Па гэтым інцыдэнце цэнтрам будуць прымацца прадугледжаныя заканадаўствам меры". Адкрыць / каментаваць

2023-07-06 19:00:16 У апошнія гады вы часцей думалі пра тое, як сабраць трывожны заплечнік, калі ў дзверы раптам пагрукаюць. Мы хочам, каб вы крыху перадыхнулі, — і адпраўляем вас у кароткі адпачынак. Лепш за ўсё — улегцы.

І вось некалькі рэкамендацый, як кампактна скласці заплечнік у дарогу (той заплечнік, дзе ў вас ляжаць шчотка і запасны камплект ніжняй бялізны, пакідаем дома).

Чытайце тут: https://euroradio.fm/zbiraemsya-u-adpachynak-10-paradau-yak-pravilna-i-kampaktna-sklasci-rechy

Гэтая спасылка адкрыецца без VPN Адкрыць / каментаваць

2023-07-06 18:20:39 Кранальная сустрэча 10-гадовай Варвары і 6-гадовага Рэната з мамай.

Яны не бачыліся 1,5 гады, бо дзяцей нелегальна вывезлі ў Расію.

Крыніца: @hromadske_ua Адкрыць / каментаваць

2023-07-06 17:50:30 Няўдалы мяцеж Прыгожына — адна з прычын падзення расійскага рубля, следам за якім пасыпаўся і "саюзны" беларускі рубель. Аднак гэтая прычына — не асноўная, тлумачыць эканаміст Уладзімір Кавалкін.

"Калі б гэта была адзіная і галоўная прычына падзення расійскага рубля, то, хутчэй за ўсё, яна б вельмі хутка адыгралася, паколькі яна не з'яўляецца фундаментальнай. Быў бы нейкі шок, які б адбыўся і адыграўся назад. Але паколькі ўсё гэта падобна на доўгатэрміновы трэнд, відаць, мяцеж Прыгожына з'яўляецца далёка не адзінай прычынай, чаму расійскі рубель падае, а следам за ім — і беларускі".

Больш чытайце тут: https://euroradio.fm/myacezh-dy-ne-tolki-chamu-adbyvaecca-padzenne-rublya

Гэтая спасылка адкрыецца без VPN Адкрыць / каментаваць

2023-07-06 17:15:03 Без “Перамогі”: чым зоймецца новае аб’яднанне сілавікоў BELPOL? Жывы эфір @euroradio з Купрэйчыкам і Астаповічам.

Што з сябе ўяўляе ініцыятыва BELPOL і чым канкрэтна будзе займацца гэтая структура? Як так сталася, што былыя калегі пасварыліся і якая ў гэтым можа быць роля спецслужб? Як гэтая сітуацыя паўплывала на імідж дэмсіл і ці будуць удзельнікі BELPOL праходзіць паліграф? На гэтыя ды іншыя пытанні адказваюць удзельнікі ініцыятывы былых сілавікоў BELPOL Мацвей Купрэйчык і Андрэй Астаповіч.

Стрым глядзіце тут, задавайце пытанні:

Адкрыць / каментаваць

2023-07-06 16:50:13 Беларускія калоніі, турмы і СІЗА таксама адчуваюць кадравы голад: у Дзяржаўнай службе занятасці можна знайсці інфармацыю пра дзясяткі вакансій. У чым рэч — у простай "цякучцы", невысокай аплаце працы пры вялікай нагрузцы або "таксічнасці" такой працы, — сказаць цяжка.

@euroradio паглядзела, каго і за якія грошы шукаюць арганізацыі, якія ўваходзяць у структуры Дэпартамента выканання пакаранняў (ДВП) МУС.

Чытайце тут: https://euroradio.fm/naglyadchyk-900-rublyou-kago-shukayuc-na-pracu-belaruskiya-turmy-i-kalonii

Гэтая спасылка адкрыецца без VPN Адкрыць / каментаваць

2023-07-06 16:18:58 Беларускія памежнікі абвяргаюць, што пры перасячэнні мяжы яны прымушаюць адмаўляцца ад "карты паляка", піша "Зеркало".

Журналістка сайта "Зеркало" затэлефанавала ў Памежны камітэт як звычайная грамадзянка і спыталася пра магчымыя праблемы пры перасячэнні мяжы. Памежнікі заявілі, што яны не правяраюць наяўнасць "карты паляка": "Нам гэта нецікава. Мы глядзім толькі пашпарт, а візу не правяраем". Адкрыць / каментаваць