2021-07-05 21:03:00
Наступствы 3 ліпеня і падзел грамадства
«Усебеларуская» малітва, якая была павінна згуртаваць наш шматпакутны народ, спрацавала, як і чакалася, абсалютна наадварот. Чыноўнікі, пастаўленыя аграфюрарам палічылі, што калі сагнаць усіх пад лозунгамі, то ўся Беларусь у адным парыве загарыцца любасцю да вядомага персанажа. Не атрымалася.
Мы ў прынцыпе ўжо пісалі пра тое, што Лукашэнка актыўна аддзяляе каталікоў ад іншага насельніцтва Беларусі, вешае на нас ярлыкі і пагражае цэлай рэлігійнай групе (
што, у прынцыпе, можна расцэньваць як абмежаванне рэлігійных воляў, а працэс
на ксёндзом Барком як пераслед за рэлігійныя перакананні). Што рабіць нам у гэтым кантэксце?
Хай гэта сціплы пагляд невялікага тэлеграм-канала, аднак, пазіцыя не змяняецца – верыць, не здавацца і не адмаўляцца ад сваіх перакананняў. Помніць досвед нашых украінскіх братоў грэка-каталікоў, якіх не зламала нават крывавая машына камуністаў, урэшце рэшт наш досвед выжывання ў нялёгкія гады бальшавізму. Не расчароўвацца ў тых Айцах, якія па-розным прычынам не выяўляюць сваёй пазіцыі, або маюць не такую яркую, як Вячаслаў Барок. У выпадку сумневаў перачытаць наш пост і зварот біскупа Алега Буткевіча.
Наша раз'яднанасць, абыякавасць да блізкага, адмова ад дапамогі зняволеным і пакутным пойдзе на карысць дыктатару. Стары як свет прынцып – падзяляй і влавствуй. Ціск, які можа аказвацца на Святых Айцоў, якія не правялі малітву «як трэба», можа ў нейкай ступені прымусіць іх прытрымаць тыя казанні, якія мы так прагнем пачуць. Наша крыўда і нерэалізацыя тых імкненняў, за якой мы прыходзім у Касцёл будзе падарункам рэжыму. Лічым сваім сціплым абавязкам паведаміць, што такога падарунка хунта не дачакаецца. Мы не завагаемся.
Магчыма, гэта досыць банальныя рэчы, якіх не трэба і агучваць... але, на наш пагляд, лепш напісаць і зафіксаваць думку, чым выпусціць яе і забыўшыся памыліцца... Мінулая «малітва», па факту, стала пэўным маркерам, што дзеліць хрысціян на прыхільнікаў і супраціўнікаў Лукашэнка.
Прынамсі, менавіта гэта, на наш пагляд, магло быць адной з другарадных мэт, што выходзяць на пярэдні план у выпадку правалу «з'яднання
беларусаў вакол Сашы 3%».
Не сакрэт, што частка праваслаўных парафій (прабачце, што мы лезем сюды ) малілася па пэўным плане, які сцвярджаўся «зверху», як гэта прынята ў грамадстве, якое не вылекавалі ад савецкай хваробы. Шмат каго, у тым ліку каталікоў, гэта пакрыўдзіла. Саша 3% забараняе нам спяваць «Магутны Божа» і адначасна з гэтым атачае сябе ідэалагічна «правільнымі» іерархамі БПЦ. Непрыгожа. Так, непрыгожа. І вельмі нават непрыемна... але цалкам перажыць можна. Гэта пройдзе. Асабліва калі не запускаць у сваё сэрца злосць і непрыязь ў адносінах да братоў хрысціян, змушаных так ці інакш браць удзел у гэтым фарсе.
Першае, далёка не ўсе праваслаўныя падтрымваюць хунту і дыктатара.
Другое, наша ўзлаванасць прывядзе да таго, што мы самі сябе ізалюем і дапаможам хунце запісаць нас у «няправільных». Такога не будзе. Усе мы «правільныя»: і каталікі і праваслаўныя. Усе мы беларусы, якія кахаюць свой родны край. Таму, мы спадзяёмся, што палеміка ў некаторых тэлеграм-каналах, якая падзяляе нас і праваслаўных заціхне.
Вельмі хочацца, каб непрыязь, якую так старанна сее «вярхоўны», замест прасвяднай глебы трапіла на камень. Мы, у адрозненні ад рэжыму, не падзяляем беларусаў. Мы любім усіх. І гатовы пасля каяння прабачаць нават тых, хто служыць рэжыму.
Мы верым у нашу перамогу і трыумф справядлівасці ў краіне.
ЖЫВЕ!
124 views18:03