2021-08-26 17:19:31
Святары ў школах – за і супраць
У апошнія дні даволі шмат абмяркоўваецца ідэя рэлігійнага навучання ў школах. Прычына – з’яўленне неўзабаве ў школах факультатыву “Асновы духоўна-маральнай культуры і патрыятызму”, які будуць выкладаць праваслаўныя святары, выпускнікі духоўных школаў ды адмысловыя педагогі.
Першае, што ў гэтым выпадку варта сказаць, дык гэта тое, што нічога кепскага ў самім факце няма. Рэлігійнае выхаванне ёсць у школах шмат якіх заходніх краін.
Разам з тым варта адзначыць некаторыя нюансы такой адукацыі, якіх пакуль я не бачу ў беларускім выпадку. Зробім параўнанне з тым, што мне распавядалі ў Нямеччыне некалькі гадоў таму (магчыма, сітуацыя ўжо памянялася – не ведаю).
Нямецкім бацькам школьнікаў прапануюць на выбар: ці то ўрокі рэлігіі, ці то ўрокі этыкі. У нас выбару не бачу, але добра, што гэта факультатыў, то бок, які-ніякі выбар застаецца.
У Нямеччыне ці не кожная канфесія мае права арганізаваць такія ўрокі самастойна. Галоўная ўмова яна павінна быць зарэгістраваная (у немцаў рэгістрацыя – гэта права, якое дае плюшкі, а не абавязак, без якога пагражаюць праблемы) і мець аб’яднанне, якое дзейнічае, здаецца, каля двух дзясяткаў гадоў.
Бацькі нямецкіх дзяцей самыя абіраюць, якой канфесіі будуць навучаць іх дзяцей – каталіцкай, праваслаўнай, лютэранскай, баптысцкай, пяцідзясятніцкай, юдэйскай, суніцкай і гэтак далей. Умова – глядзі вышэй. Галоўныя цяжкасці могуць узнікнуць, калі ў вашай канкрэтнай мясцовасці няма, напрыклад, адпаведнага праваслаўнага выкладчыка. Але вы можаце абраць тады канфесію, якая для вас бліжэй, або ўрокі той жа этыкі.
У Нямеччыне бацькі і канфесіі кантралююць настаўнікаў, што яны выкладаюць. Самыя настаўнікі праходзяць адмысловую адукацыю.
У Беларусі ж я бачу праблемы з усім гэтым.
Ці змогуць беларускія бацькі абраць канфесію, якой будуць навучаць іх дзяцей, або да ўсіх прыйдуць праваслаўныя настаўнікі?
Ці змогуць беларускія бацькі кантраляваць, што ім выкладаецца?
Ці не будуць урокі замяняцца лекцыямі пра любоў да ўладаў, пра “няправільных змагароў” або ўвогуле пра “трыадзіную Русь”?
Наколькі можна разлічваць, што ў святароў будзе належная педагагічная адукацыя? Якія кадры будуць прыходзіць у школы ва ўмовах зачысткі нелаяльных, што апошні год ідзе ў БПЦ, якая і стаіць за такімі ўрокамі?
Так што, падсумоўваючы, магу сказаць, што хаця і з’яўляюся прыхільнікам рэлігійнага навучання ў школах, у гэтай канкрэтнай сітуацыі я б усё ж устрымаўся аддаваць сваіх дзяцей на прапанаваныя ўрокі.
178 views14:19