2021-10-02 10:46:32
Цікавая размова адбылася паміж Сьвятланай Ціханоўскай і Ювалем Харары, гісторыкам і пісьменьнікам, які шмат піша пра мінуўшчыну, сучаснасьць і будучыню.
Яны сустрэліся ў Афінах падчас форуму дэмакратыі. Пачытаць і пазнаёміцца з Харары параіла Сьвятлане Ціханоўскай Сьвятлана Алексіевіч. Праўда, ініцыятарам сустрэчы выступіў менавіта ён, і ён жа прапанаваў паўдзельнічаць разам у панэльнай дыскусіі.
Рамова адбывалася ў гатэльным пакоі. Ціханоўская адразу распавяла, што ў Машы Калесьнікавай адабралі кнігі Харары, правяралі ці то на экстрэмізм, ці то шукалі схаваныя пасланьні нябачнымі чарніламі.
Сьвятлана і Юваль Ной размаўлялі пра тое, як сыходзяць дыктатары тыпу Лукашэнкі, што імі кіруе і як падтрымаць энэргію ў грамадзтве ва ўмовах тэрору. Харары казаў, што хоць і не зьяўляецца экспэртам у Беларусі, але ў такія моманты ніто ня можам дакладна спрагназаваць разьвіцьцё падзеяў. У пэўны момант размовы Харары назваў Ціханоўскую палітыкам, што яна на сваім месцы, бо людзі без палітычнага досьведу, могуць бачыць рашэньні, якія ня бачаць прафэсійныя палітыкі, абмежаваныя правіламі і ўласным досьведам. Менавіта такія людзі мяняюць правілы гульні. Ён прывёў у прыклад шахматы і правілы, як ходзяць фігуры. Людзі новыя ў палітыцы гэтыя правілы мяняюць.
Потым Харары і Ціханоўская выступілі на панэльнай дыскусіі пра тое, як узнавіць давер у сьвеце. Дыскусія адбывалася на Агоры, на месцы, дзе Сакрат і Платон сустракаліся з вучнямі. Ціханоўская распавяла як фармаваліся падчас пратэстаў супольнасьці лекараў, студэнтаў, рабочых. Як зьяўляліся дваровыя супольнасьці, дзе зьбіраліся аднадумцы папіць гарбаты, філёзафы чыталі лекцыі, музыкі сьпявалі. Ціханоўская адзначыла, што ў людзей па розныя бакі супрацьстаяньня розныя стымулы: людзі рэжыму аб'яднаныя страхам. На кожнага ёсьць кампрамат, мы бачым гэта па зьлівах, якія публікуюць кібэрпартызаны. А людзі перамен аб'яднаныя каштоўнасьцямі і даверам адно да аднаго, і гэты давер рэжым спрабуе зараз зьнішчыць.
1.1K views07:46