Қарақалпақ Әдебияты

2021-07-15 13:11:29 ШЫРАЙҒА ЕНЕР

Жақсы ҳаялларға жас миңген сайын,
Гүзде ашылған гүлдей шырайға енер.
Майысқан мəжнүн тал жыл өткен сайын,
Салланысып сарҳаўызға сəн берер.

Изде қалған қыз дəўранның қызығы,
Ақ жүзине түскен əжим сызығы.
Жаста жайтаңлаған көздиң сүзиги
Хош əдеп, мулайым ҳəм илҳам берер.

Отырыслары ханның қонағы яңлы,
Сырлы сулыўлықтың булағы яңлы.
Көп жыллық Муҳаббат шарабы яңлы,
Сөйлегени сөз мүлкине жан берер.

Ақыл, парасатлы шын дилбар десе,
Кəйўанылық кимге жарасар десе,
«Қызларға бергисиз жаўан бар» десе,
Ашық Аяз сол нақылға тəн берер.

Автор Ибрайым Юсупов

@ADEBIYAT_QR Адкрыць / каментаваць

2021-07-15 10:22:44 Òmir haqqinda

Sinaw òzi Òmir turisi,
Dàrtin qatar terip qoyadi.
Bazda onnan tùñiler bolsañ,
Jàne ùmit berip qoyadi.

Jildirimday òtedi waqit,
Atar tañdi kùtip jùrgende.
Bir gezde dàrt,bir gezde baxit,
Barliģin da kòredi bende.

Adamlardiñ aniq minezin
Sen de mendey tùsinbediñbe?
Otirmas em jalģiz bir òzim,
Olardi dàl tùsingenimde...

Qàdirsiz-aw bul waqit shirkin,
Bolsadaģi altinnan qimbat.
Hàreketsiz òter gey bir kùn,
Tek saattiñ "shiq-shiģ"in tiñlap.

Òmirde kòp bilseñ shadliģiñ,
Òtip keter, saģan aytpaydi.
Sonda bir kùn qumsap barliģin,
Qàleseñ de izge qaytpaydi.

Sol ushin da jasañ qàdirlep,
Òmirdiñ hàr sekund -saatin.
Jùre berseñ "òmir-jàbir" dep,
Pitip qalar jasaw saatiñ...

Jasa...endi jasap qal, endi...

Ğàlet bir tolģanis kelgen waqtinda,
Eki awiz sòz ayttim Òmir haqqinda...

Avtor Rufat Eshanov o7.o7. 2o21

@sahrayi_shayir
@ADEBIYAT_QR Адкрыць / каментаваць

2021-07-15 08:28:56 ​​ЖАСЛАРҒА

Отырарман қыял сүрип,
Көзден қашар түн уйқылар.
Пешанамды самал сүйип,
Шуғла шашар ой туйғылар.

Шыдай алсам азабына,
Үмитлер, шийрин туйылар,
Ал, қәлемнен қағазыма
Әрманлар келип қуйылар.

Излесем ойдың түпкирин,
Босалаң сөзлер тыйылар.
Елесем илхам ғалбирин,
Ҳақ ғаний гәплер жыйылар.

Кеўлим шартәрепти гөзлеп,
Акэқлым ушар аспанына.
Кирсем жаңа мәни излеп,
Поэзия бостанына.

Онда мен жүрермен бақлап,
Дийли бәлент пәрўазларды.
Хәр сөзин жүректе сақлаң,
Тыңларман жас ҳаўазларды.

Турарсызлар нәзеримде,
Нарттай болып өзлериңиз.
Ой жемиси әзелинде,
Caп дүзеген сөзлериңиз.

Жалғасындай өз сөзимниң,
Жаңлар деп үмит етермен.
Сол ушын бәрҳә көзимниң,
Қарашығындай күтермен.

Ҳәp бириңди әдиўлермен,
Ағалық меҳирге орап.
Сүйеў көрип қәдирлермен,
Сизде қәдирлерсиз. Бирақ.

Гей қыңыр минезлериңди,
Дүзете алмай өтермен,
Сонда да жаслар сизлерди,
Ойлайда ойлай кетермен.

Ел ышқында жәўлан урған,
Сүйермен өрминезиңди.
Жасты көрсем жанып турған,
Мен көрермен дәл өзимди.

Автор Байнияз Қайыпназаров

@Bayniyaz_Qayipnazarov
@ADEBIYAT_QR Адкрыць / каментаваць

2021-07-14 16:40:48 Аты фамилияңды төмен қулатпай,
Сызықтың устинде турыўың керек!
Сени кулдирген анаңды жылатпай,
Сен быйыл оқыўға кириўиң керек!

Бәрше абитуриентлерге Алла Таала нәзери түсип жоқары оқыў орнына кириўине тилеклеспен. Ҳүрмет пенен
Шамуратов Азамат

Өтиниш сүўретти булдирип тасламаң!!! Бояп өзгертип, монтажлап ҳ.т.б лар менен.

t.me/adebiyat\_Qr Адкрыць / каментаваць

2021-07-14 14:17:17 БОЛМАС

Жерге хызмет қылмай полат пазналар,
Жүзлери жарқырап ашылған болмас.
Елге хызмет қылмай ғошшақ жигитлер,
Ерлик сыннан өтип, ысылған болмас.

Жақсыларға хызмет қылсаң жасыңда,
Қартайғанда жаслар жүрер қасыңда.
Гүрлеп жанған отты ошақ басында
Киси қолы менен ысырған болмас.

Қəстерле өзиңниң ҳаслы затыңды,
Жоқары тут беглик инабатыңды.
Жаслар тутып байламаса атыңды,
Оларды ғыйбатлап қысынған болмас.

Ашық Аяз айтар, тəңирим берселер,
Жақсылар шад болып дəўран сүрселер.
Əўел-ақыр пейли бузық кимселер
Ҳажға барған менен мусылман болмас.

Автор Ибрайым Юсупов

@ADEBIYAT_QR Адкрыць / каментаваць

2021-07-14 10:28:45 Дипломлы қыз

(сораулар бойынша)

Оқып Нөкистеги билим дәргайын
Уақыт питип бирден қылды бәржәйын
Хабарласып турсақтағы хәрдайым
Дипломлы қыз. Бос қалдым-ау өзиңнен

Арыу едиң, сулыулардың сәрдары
Бүгин муң тербелер кеулим тарлары
Оқығанның көп болады қардары
Дипломлы қыз. Бос қалдым-ау өзиңнен

Пәрий болдың тауыс киби доланған
Жүрислериң наз-ийбеге оранған
Хәттеки қызғанып сени жорамнан
Дипломлы қыз. Бос қалдым-ау өзиңнен

Шықтым пайтахтқа гәде асыға
Қайтқаным тез аяққа от басыла
Сол гезде көбирек бармай қасыңа
Дипломлы қыз. Бос қалдым-ау өзиңнен

Бәлким қылды бул ақылым жартылық
Гүнәмды мойынға жүрмен артынып
Өз уақтында сүйдим деуге тартынып
Дипломлы қыз. Бос қалдым-ау өзиңнен

Қапталымнан өтсе хүрлер дүркини
Мен сағындым сендеги хош күлкини
Сап ышқымды сезинер деп бир күни
Дипломлы қыз. Бос қалдым-ау өзиңнен

Тәғдир хәзиллесип етти пәслигин
Қоймай мениң менен дәсме-дәслигин
Бирден тарқап үмитлерден мәслигим
Дипломлы қыз. Бос қалдым-ау өзиңнен

Айтпағаным "маған жалғыз сен керек"
Қала бердим излериңде ентелеп
Неге буны түсинбедим ертерек?
Дипломлы қыз. Бос қалдым-ау өзиңнен

Пайдасы не? Отырғаным шырпынып
Нәтиже жоқ мың ойлансам жулқынып
Қолым артын алақанға бир урып
Дипломлы қыз. Бос қалдым-ау өзиңнен

Орта мағлыуматтан қурап барымды
Жыр әйледим сендей жырақтағымды
Кешир... Хәддим сыйып унатқанымды
Дипломлы қыз. Бос қалдым-ау өзиңнен

Мен кешиктим, хақыйқатты тән алсам
Енди оқымыслы, жетик мамансаң
Бирақ жүрегиме жақын жанансаң
Дипломлы қыз. Бос қалдым-ау өзиңнен

Автор Жангелдиев Ниетулла (Ойшыл) 20.07.2020 ж

@ADEBIYAT_QR Адкрыць / каментаваць

2021-07-14 08:02:11 Сен…

Бул өмирди не зат деп,
Өрли-ғурлы ақпа сен.
Төрт тәрепим азат деп,
Қанатыңды қақпа сен.

Ойлама оны гүлбақ деп,
Гүл өсирсе жулмақ көп.
Бул өмирде жумбақ көп,
Белшериңнен батпа сен.

Бахыт деген қус дейди,
Дәргайыңа түспейди.
Түссе ийтлер тислейди,
Лекин, қарап жатпа сен.

Өмир болмас әнайы,
Шадлық ҳәм дәрт панайы.
Болмасаң да малайы,
Жүгине бер саққа сен.

Гәпти қолдан жаздырма,
Журтты жолдан азғырма.
Өмир деген жаздың да
Қысын ядта сақла сен.

Дастурханға нанды үйип,
Досларыңа барды үйип,
Жасаў ушын мардыйып,
Елдиң дузын ақла сен.

Бул өмирдиң қыры көп,
Ақтарылар сыры көп,
Суўырылар қылы көп,
Қамыр ийлеп, ҳаққа исен.

Автор Кеңесбай Рахманов 1999

@ADEBIYAT_QR Адкрыць / каментаваць

2021-07-13 19:38:10 Қарақалпақстанда жалғыз болған дубляж каналға бәршеңизди мирәт етемен.

Ең әҳмийетлиси бул каналда Қарақалпақ тилинде искерлик алып барады. Және де мәнили видеоларды сизге инәм етиўши канал.

Каналға қосылың. Қарақалпақша кулисемиз

Канал силтемеси:

@QarekensheDublyaj Адкрыць / каментаваць

2021-07-13 17:34:39 Ана тилди таза етип сөйлеңлер,
Басқа тилге араласып жүрмеңлер,
Кешир мени ана тилим деп ертең...
Күлки болып, келешекке күймеңлер.

Бийбиайым Айтмуратова (Луна)

@ADEBIYAT_QR Адкрыць / каментаваць

2021-07-13 15:37:07 ТАЛЛАР ЖАПЫРАҚ ТӨКТИ, УРЫҚЛАР ҚУЎРАП...

Таллар жапырақ төкти, урықлар қуўрап,
Тек те атқулақлар жаўдырасады.
Азан-ғазан ала қарғалар шуўлап,
Аспан қумайтланып, сыйқы қашады.

Қуўрақ қамыс ызыңлайды намаға,
Ертең - бир күн суўық түсиўи мүмкин.
Көптен жылымаған мусəпирханама
Сен жылыў əкелген күн еди бул күн.

Оннан берли бəҳəр бес ирет көклеп,
Бес ирет қублаға қайтты тырналар.
Дүзде бес мəртебе жантақлар сөклеп.
Нарт шыбықлар тал болдық деп ырғалар.

Муҳаббат ҳəм ошақ бийғəрезлигин
Қорғаўда сен мəртлик көрсете алдың.
Еркин қыз ўағыңды сағынып бүгин,
Муңлы бир ноқатқа тигилип қалдың.

Қой, өйтип талдырма қарар көзиңди,
Қайғы жараспайды, шабазым, саған.
Толған айдай дөңгеленген жүзиңди
Өйтип төмен салма не болса соған.

Билемиз ағайин деген кисини,
Базда жанын саған суўырып берер.
Қəпелимде сəл нəрсеге исинип,
Ғыйбат «бес бийдай» ын қуўырып берер…

Қатын деген еркектиң тас қайрағы,
Ол қайраса, қазан пышақ, қыл қаўар.
Аңгөдек ер гийне таўып қайдағы,
Телпегин терис кийип, ийт болып қабар.

«Ағайин азар да, безери болмас»,
Оның бары жақсы не деген менен.
Қарға «ғақ» дегеннен қыс түсе қоймас,
Ат жүрисин бузбас ийт үрген менен...

Қара, қаныңдай кең бул ата мəкан!
Ата-бабамыздың алтын мийрасы.
Қаншама əўладлар миннетдар оған,
Ҳəммеге де жеткен ырысқы мийуасы.

Бул елге, бул журтка сениң ықласың
Ағын суўдай таза ҳəм де раўан.
Қушақ ашар қанша қурбы-қурдасың,
Ҳəм йошлы қосықлар жаздырар маған.

Жатқан бир кең дүнья бул ата мəкан,
Тек мəзи тарылған адам пейили.
Кеўли тар бендеге тардур бул жаҳан,
Дүнья кең пейилге - наўрыз сейили.

Тəңирим үркитпегей бул дəўлет қусын,
Бир қысым топырақ бар тойымсыз көзге.
Кеўлиңди тарылтпа, қосшым, ол ушын,
Кеңлик жарасады сиз бенен бизге.

Таллар жапырақ төкти, урықлар қуўрап,
Тек те атқулақлар жаўдырасады...
Ағайин гийнеси - ийт тартқан туўлақ,
Ертең умытып, жəне қушақ ашады...

Автор Ибрайым Юсупов Январь, 1999-жыл.

@ADEBIYAT_QR Адкрыць / каментаваць