Яшчэ ў пачатку XX стагоддзя на правым беразе Ласасянкі, недалёка ад моста праз раку, знаходзіўся памежны слуп.
Ён быў змураваны з цэглы ў выглядзе абяліска. Яго вышыня складала прыкладна 8 - 10 метраў, а чатырохкутны падмурак да 4 метраў у шырыню. Даследчык Юзаф Ядкоўскі лічыў, што слуп знаходзіўся на мяжы Літвы і Польшчы і быў пастаўлены ў часы Станіслава Аўгуста Паянтоўскага. На ім было дзве пліты з сімваламі двух краін.
Але сучасныя гісторыкі лічаць, што абяліск змуравалі пазней. Хутчэй за ўсё, памежны слуп знаходзіўся на мяжы Прусіі і Расіі. Бо ў перыяд з 1795 па 1807 год, па Ласасянцы пралягала мяжа паміж гэтымі краінамі.
Слуп зруйнавалі пасля Другой сусветнай вайны, калі млын каля яго прыйшоў у заняпад.
