2022-05-02 19:33:06
45 ГАДОЎ ТАМУ АДБЫЛАСЯ ТРАГЕДЫЯ НА ЧЫГУНЦЫ 2 ТРАЎНЯ 1977 ГОДА
2 траўня 1977 года адбылася найбуйнейшая катастрофа на чыгунцы, у якой загінула 22 чалавекі і 82 атрымалі траўмы. Падзеі адбыліся на станцыі Крыжоўка, што пад Менскам. Пасажырскі цягнік урэзаўся ў электрычку, што стаяла на платформе – два вагоны цягніка сышлі з рэек.
Трагедыя адбылася праз збег абставінаў, выкліканы выключна чалавечым фактарам. Падзеі разгортваліся наступным чынам:
2 траўня 1977 быў вельмі спякотным днём, тэмпература паветра прагрэлася да 30 градусаў, а рэйкі раскаліся да 43 градусаў. Пра анамальнае надвор’е супрацоўнікі чыгункі былі папярэджаны загадзя.
У дыспетчаркі станцыі Крыжоўка 20-гадовай Бруйло на пульце загарэліся дзве сігнальныя лямпачкі, якія папярэджваюць пра збліжэнне цягнікоў. Але насамрэч цягнікоў не было – рэйкі самкнуліся ад спёкі, што і давала ілжывы сігнал пра небяспеку.
Бруйло не даклала пра збой дзяжурнаму дыспетчару па Маладзечанскаму напрамку, але выклікала электрамеханіка Мікалая Кухарава, каб той выправіў непаладкі.
Электрамеханік Мікалай Кухараў разам з майстрам Зянонам Петрыкам накіраваліся вырашаць праблему, але пры гэтым, баючыся разборак з кіраўніцтвам, не спынілі рух цягнікоў на ўчастку, як гэтага патрабавала інструкцыя. Яны працягвалі ўключаць зялёнае святло і пускаць цягнікі.
Так яны прапусцілі 12 цягнікоў, у тым ліку ў 17.00 электрычку Аляхновічы—Менск. Пасля гэтага яны забыліся вярнуць на ўчастку чырвонае святло, і праз некалькі хвілін на ілжывае зялёнае святло праехаў пасажырскі цягнік Гродна—Орша і накіраваўся на той жа пуць, на якім стаяла электрычка.
У той жа час машыніст цягніку Гродна—Орша Анатоль Якубоўскі ехаў адзін, без памочніка машыніста, бо літаральна за дзень да гэтага кіраўніцтва Чыгунцы вырашыла ўвесці «эксперымент» – пускаць у шлях машыністаў без памочнікаў.
Перад аварыяй машыніст Якубоўскі адсутнічаў на сваім месцы, бо пад час руху ў машынным аддзяленні адбыліся непаладкі з ціскам. Як ён быў адзін, ён пайшоў вырашаць праблему, заціснуўшы педаль цэглай, каб цягнік працягваў рух.
У той жа час дзяжурная па станцыі Крыжоўка Бруйло не папярэдзіла машыніста пра электрычку на пуцях, бо адышла са свайго працоўнага месца і адсутнічала 13 хвілін. Яна хадзіла паглядзець на пажар – загарэлася букса, тэхнічны элемент лакаматыва.
Калі машыніст Якубоўскі вярнуўся з машыннага аддзялення і ўбачыў электрычку на пуці, ён разгубіўся і не паспеў затармазіць.
Аварыя адбылася ў 17.14.Па выніках крымінальнай справы толькі электрамеханік Мікалай Кухараў прызнаў сваю віну. Ён атрымаў 12 гадоў пазбаўлення волі, майстар Зянон Петрык быў асуджаны на 10 гадоў, машыніст Анатоль Якубоўскі – на 7. Маладая дзяжурная Бруйло зацяжарала пад час следства і атрымала 4 гады ўмоўна.
Трагедыя амаль не асвятлялася ў СМІ, а ўсе вінаватыя патрапілі пад амністыю, і іх тэрміны былі скарочаныя.
Памяць ахвяраў не была ўшанавана.
808 viewsedited 16:33
B
