Men saǵındım... Appaq qarday tilegiń bolsın, Aq mamıqtay júr | Қарақалпақ Әдебияты

Men saǵındım...

Appaq qarday tilegiń bolsın,
Aq mamıqtay júregiń bolsın.
Bolmasań da heshkimge mútáj
Birewlerge keregiń bolsın!

Aytıw qıyın ishki sezimdi,
Jas jetkeni mine sezildi.
Búgin qattı saģınaman men
Jol shańģıtqan bala gezimdi...

Bala geziń - bul altın taǵıń,
Sambırlatqan awıldıń jabın.
Hesh nársege almaspas em men,
Xat tanıtqan mekteptiń shaǵın.

Dúnya isi - janǵa jábir-di,
Basalmayman ele háwirdi,
Sol qız benen tap qılǵan ay-hay,
Saǵındım-aw kollej dáwirdi.

*

Qız! Tákabbır! Súymeymen, sózim!
Ashıq bop bir aǵardı kózim.
Mıń qosıq ta siz ushın az-dı,
Mıń maqtawǵa ana ılayıq óziń.

Qızlardı jır ettim, olar kim edi?
Tapsa ayıp taptı, sınap-minedi.
Jerdiń júzi sennen keshse de
Anań seni jaqsı kóredi.



Saǵınıshtıń dárti jaman-dı,
Bánt etedi kewil xanańdı.
Kewilimdi aytpay-aq bilgen
Saǵındım men altın Anamdı.

Anam aytqan ertekler qanday!?
Tıńlar edim házir-ám janday.
Ayra saldı anamdı bizden...
Múmkin, usı - biz deytin - mańlay?

*

Ana gúlzar, bizler lalamız,
Alla deymiz ǵayrat salamız.
Shúkir ana tilegiń edi...
Student ǵoy eki balańız!

Ákejanım asqar tiregim,
Jan uyam bul janım, júregim.
Oqıw betten sálem jollayman
Saw bolıńlar, Quday, tilegim!

Avtor Quwandıq Atabaev 25-dekabr, 2021-jıl

@i_madiy
@ADEBIYAT_QR