Працягваем допіс пра ганчарства ў Рэчках Вілейскага раёна, на гэты раз ужо па ўласных матэрыялах. Вялікі ўплыў на керамічную вытворчасць у мястэчку аказалі майстры з Івянца – бадай, найбольш высокаразвітага ганчарнага цэнтра ў Беларусі. З-за вялікай канкурэнцыі івянецкія ганчары вымушаны былі шукаць іншае месца жыхарства. Так, вядома, што ў Рэчкі пераехалі Іосіф Кільчэўскі і Райманд Судакевіч. Па сённяшні дзень у вёсцы добра памятаюць іншага перасяленца з Івянца – Мар’яна Доўнара, які прыехаў у Рэчкі, відаць, яшчэ перад вайной, у маладым узросце. Ён лічыўся лепшым ганчаром, вучыў сакрэтам рамяства мясцовых майстроў. Можна дапусціць, што менавіта з івянецкімі ганчарамі першапачаткова звязана вытворчасць у паселішчы паліванай керамікі. Да таго ж, “жбанкі” з Рэчак маюць пэўнае падабенства формы з івянецкімі, асабліва што датычыцца выгіну вуха.
