Пра 'духоўнасць і патрыятызм' 2 Чамусьці ніхто не звяртае ўва | Беларускі Бабілон

Пра "духоўнасць і патрыятызм" 2

Чамусьці ніхто не звяртае ўвагі на просты факт: патрыятызм - гэта дарослае пачуццё.

Патрыятызм - гэта 18+, як пачуцці паміж мужчынам і жанчынай.

Любіць Радзіму чалавек пачынае ў дарослым узросце. Ці не пачынае. Але ў любым разе гэта складаны і вельмі асабісты набор эмоцый дарослага чалавека.

Бусел у аблоках, песні каля вогнішча, пусты праспект у 5 раніцы, руіны замка, любімая кавярня, начныя прыгоды ў богам забытай палескай вёсцы, бацькі, сябры, сям'я, дранікі.

Усё гэта пачынае працаваць і раптам складваецца ў любоў да Радзімы толькі ў дарослым узросце. Нават, Марат Казей з гранатай, гэта, калі разабрацца, не патрыятызм, гэта крыху пра іншае.

Вось жа, навучанне ў школе патрыятызму - гэта нейкая поўная бязглуздзіца. Гэта як трэніраваць у школе любоў паміж мужчынам і жанчынай.

Відавочна, на уроках літаратуры разбіраюць няшчаснае каханне Рамэо і Джульеты. Але ж гэтаму пачуццю ніхто не вучыць!

Шчыра перакананы, што слова "патрыятызм" трэба цалкам выкідаць са школьнай праграмы.

Школа сур'ёзнае месца, там трэба трэніраваць грамадзянскія навыкі, а высокія пачуцці самі прыйдуць калі трэба.

Ад іх усё адно нікуды ня дзенешся.