Ne sóziń bar dúnya Qaraqalpaqqa! Ne sóziń bar dúnya Qaraqalpa | Қарақалпақ Әдебияты

Ne sóziń bar dúnya Qaraqalpaqqa!

Ne sóziń bar dúnya Qaraqalpaqqa!
Azsınıp, bassınar xalıq bildiń be?
Ándiysheni shıģarģanlar qorqaqqa,
Ótmishke kóz jumıp, hálsiz kórdiń be?

Biz saģan ótpeyik tariyx sabaģın,
Tilde dástan bilseń "ápsanalarım".
Aģar qanı, shıģar janı biraģı
Watanın bermeydi Qaraqalpaģım!

Mártligi tek "til"de, "bilek"te emes,
Joqarı insaniy pazıyletinde!
Jawģa qarsı alıp barsa da gúres,
Ózi barıp hesh tiymegen ázzige.

Húrmet etken biradar, dos - yaranın,
Hám biledi óz qádirin, izzetin.
Onnan sora, ol beredi juwabın,
Bir sheshimge kelme almay sáwbetin.

Teńler menen teń milletim, hár xalqım,
Erkinligim - bas baylıģım hám baxtım.
Biz qorģaymız, tiri tursaq áwladlar!
Jańla gimnim, jelbireyber bayraģım!!!

Tegin yáki sıylıq emes kimnendur,
Dosnazarov gúresken namıs ol "stan"
Arsız jasaw ólimnen de tómendur,
Mángi jasa, mángi - Qaraqalpaqstan!!!

Avtor Gózzal Jumamuratova
27.06.2022

@G_Xalmuratovna_1024
@ADEBIYAT_QR