АЎЫЛЛАРДА
Дузлы самал ессе де, даўылларда,
Берекеттиң барлығы аўылларда,
Барсаң қарсы алады қурақ ушып,
Ата-анаңның көзи- баўырларда.
Атызда түрли жемис жайнап турар,
Бағларда тынбай бүлбил сайрап турар,
“Бар табағым, кел табағым” үрпге сай,
Қазаны оттан түспей қайнап турар.
Дарўазасын тарс жаўып алмас илип,
Мийманды қарсы алар: күтип күлип,
Атырыпты көшпестен, өмир сүрип,
Жери тайғақ болса да жаўынларда.
Қоңсы- қоңсыдан жоғын алар сорап,
Қора толы қой- қозы, ешки- ылақ
Жайлаўдан от жеген мал: ағар булақ-,
-Сүт береди молынан саўынларда.
Халқы дым ақ көкирек, сада бәри,
Дийханшылық тийкарғы кәсип кәри,
Күн нурына писирген:- бермей дәри,
Шийрин шекер пал татыр қаўынларда.
Ҳүрметлерин жайына қойып қарттың,
Геўдесинен ийтермес ҳасла жаттың,
Халқымызға тән болған дәстүр салттың,
Қаймағы бузылмаған аўылларда.
Автор Ақшолпан Аманияз 17.06.2022 жыл
@ADEBIYAT_QR
