Невядомая Беларусь

в.Агароднікі, Ганчарскі с/с, Лідзкі р-н, Горадзенская вобл., Рэспубліка Беларусь.
53.718047, 25.457879

Дакладна вядома, што капліцу сьв. Іаахіма (Яхіма) й Ганны пабудавалі ў 1763г. Будаўніцтва было распачата родам Салагубаў у іхнім маёнтку Вашкевічы. Першпачаткова будавалася ў якасьці парафіі.

Потым парафія гарэла, аднаўлялася, але ж яна была амаль цалкам разубрана (апошні здымак са станам на пачатак 90-ых).

Аднавілі* капліцу ў напрыканцы 20ст., але ж не зусім у першапачатковым выглядзе. Калі дакладней, то антаблемент** ня быў адноўлены.

На першым здымку каплічка на могілках за асноўнай капліцай.

*Зьвесткі ўзяты з беларускай Вікіпэдыі, аднак я бачыла й іншую інфармацыю пра аднаўленьне на сайце mytravel.by. Стары здымак узяты таксама з гэтай крыніцы.

**Антаблемент - арачнае перакрыцьце (павінна знаходзіцца над калёнамі, але ж яго не аднаўлялі)

Прыгажосьць маёй краіны

г.Высокае, Камянецкі р-н, Берасьцейская вобл., Рэспубліка Беларусь.
52.372953, 23.376081

Маленькая каплічка сьв. Варвары на ўскраіне горада часта застаецца пакінутай без увагі, бо гарадок, багаты на славутасьці, прыцягвае падарожнікаў найвядомейшымі месцамі. Таму ў другую сваю вандроўку я не магла не завітаць да яе.

Капліца пабудаваная ў 1772г. з цэґлы. На апошнім здымку можна ўбачыць, што некалі дах упрыгожвала разная вежа, вылітая з чыгуну.

Напрыканцы 19ст. у капліцы зладзілі склад і толькі праз 100 гадоў аднавілі.

І хаця цяпер яна замкнутая, старонкі кніг захоўваюць памяць пра ляпніну й рэльефы на ўнутраных сьцянах каплічкі («Архітэктура Беларусі» пад рэдакцыяй А.А.Воінава й калегіі).

в. Станькава, Койданаўскі р-н, Менская вобл., Рэспубліка Беларусь.
53.635386, 27.218888

Вялікі парк у Станькава быў закладзены ў 70-ыя гады 19ст., А празь дзесяць гадоў быў пабудаваны палац Гутэн-Чапскіх, які да нашых дзён не захаваўся.

Затое захавалася ўнікальная бібліятэка "Скарбчык" з чатырма вежамі. Напэўна, гэтая бібліятэка й зьяўляецца асноўным магнітам для падарожнікаў.

Калісьці ў ёй захоўвалася дваццаць тысяч тамоў кніг, малюнкі, жывапіс, графіка, іконы, зборы рукапісаў. Але ж у 1894г. частка калекцыі была вывезена ў Кракаў (цяпер захоўваецца ў музэі).

Таксама на тэрыторыі захаваліся гаспадарчыя пабудовы, флігель, дом для працоўных, рэшткі ваданапружнай вежы й брамы, чароўная альтанка.

У гады Другой сусьветнай вайны ансамбаль спалілі партызаны.

Цяпер у паркавым ансамблі разьмяшчаецца школа-інтэрнат, Цэнтар турызму й краязнаўства й нават некалькі жылых будынкаў.