Мой край, што крыж на сэрцы мае... 20 ліпеня 1880 — нарад | Супер Мова
Мой край, што крыж на сэрцы мае...
20 ліпеня 1880 — нарадзіўся Гальяш Леўчык (Слонім) — беларусазнаўца, паэт, публіцыст, перакладнік, музыка.
Сапраўднае імя творцы было Ільля Ляўковіч. Друкавацца пачаў з 1908 ў «Нашай ніве». Выдаў зборнік вершаў «Чыжык беларускі» (Вільня, 1912). У 1920-я далучыўся да рэвалюцыйна-рамантычнага кірунку заходнебеларускай паэзіі. Выступаў як публіцыст, гумарыст і сатырык (друкаваўся ў гумарыстычных часопісах «Авадзень», «Маланка». Супрацоўнічаў зь дзіцячым часопісам «Заранка».
У Варшаве Гальяш Леўчык зьбіраў сродкі на пасьмяротнае выданьне зборніка твораў Сяргея Палуяна, шукаў платную рэкляму для «Беларускага календара», выпытваў у зьбяднелых арыстакратаў Польшчы граматы, пячаткі, беларускія выданьні.
Меў багатыя, найперш беларусазнаўчыя бібліятэкі ў Варшаве і Слоніме. Зьбіраў і апрацоўваў фальклёр, узоры народнай керамікі. Добра граў на гітары, акарыне, маляваў. На свае тэксты пісаў музыку (зьберагліся ноты яго песьні «Мне трэба умярці…»). Пераклаў на беларускую мову творы Ю. Славацкага, У. Сыракомлі, М. Канапніцкай, К. Тэтмаера, А. Лянге і інш. Падрыхтаваныя ім зборнікі вершаў «Беларускі жаваранак» і трыялетаў «Мудра пагаворка — соладка і горка» аўтару выдаць не ўдалося.
Мой край крыжоў, дзе сьлёзы льюцца,
Дзе віхар зьдзеку ня сьціхае,
Скуль жаль і боль у сьвет нясуцца,—
Мой край, што крыж на сэрцы мае…
Гальяш Леучык — Беларусь — мой край.
#мова #supermova #пісьменьнік #гісторыя #этнаграфія
