2021-07-28 07:16:22
ПРА САНКЦЫІ, АМЭРЫКУ І ЦАРКВУ
Адносна паездкі групоўкі Ціханоўскай ў ЗША. Група доўгі час дамагалася гэтай паездкі. Урэшце, іх запрасілі. Амэрыка -- гэта не Эўропа. Але яны й там сьпяваюць сваю суіцыдную песьню: "Санкцыі-санкцыі". На фоне генацыду і зьнішчэньня беларускай грамадзянскай супольнасьці яна гучыць злачынна. Групнікі ведаюць, што рэжым выставіў ультыматум: будуць санкцыі -- зьнішчым усю беларускую грамадзянскую супольнасьць. І злачынцы з абодвух бакоў пайшлі на зьнішчэньне супольнасьці.
І цяпер пра санкцыі. Эканамічна-гандлёвыя санкцыі могуць мець уплыў, калі яны ўводзяцца з патрабаваньнем да іншай краіны адмяніць нейкія канкрэтныя дзеяньні (скажам спыніць экспэрымэнты па распрацоўцы атамнай бомбы, ці спыніць рэпрэсіі насельніцтва па рэлігійных (этнічных) прыкметах, што выклікала хвалю ўцекачоў, і т.п.). Такія санкцыі могуць стаць дзейснымі, могуць дасягнуць выніку.
Тым часам гісторыя ня мае прыкладаў, каб санкцыі зьнішылі дыктатуру і ўладу дыктатара, прымусілі б дыктатара адмовацца ад улады. У выніку такіх дурацкіх "санкцый" супраць улады дыктатара грамадзтва гіне, народ гібее, а рэжым і дыктатар застаюцца. Гэта тое, што трэба ведаць у палітыцы. Санкцыі выгадныя тым, хто іх уводзіць.
60 гадоў санкцый супраць Кубы (эмбарга, эканамічны байкот) давялі да жахлівай паразы, бядоты і нястачы гэтую да 1960-га года квітнеючую краіну і харошы народ, але не паўплывалі ні на ўладу Кастра, ні на антынародны рэжым.
У Паўночнай Карэі, дзякуючы "санкцыям" людзі ядуць траву, старажытны культурны народ камуністы падстрыглі ў робатаў, у духоўна зламаны натоўп, у краіну без грамадзянскай супольнасьці, дыктатуру ў якой можа цяпер зьнішчыць толькі вонкавае ваеннае ўмяшаньне, якога, аднак, ня будзе, таму што рэжым стварыў атамную зброю.
Венесуэла -- нафтаносная краіна, за кароткі час, дзякуючы, перш за ўсё, тупым санкцыям, ператварылася ў зону гуманітарнай катастрофы, дзе 85 адсоткаў насельніцтва галадае, а сярэдні заробак -- 4 даляры ў месяц. Эўрапейцы, якія туды трапляюць, ня могуць зразумець, якім чынам той народ яшчэ жыве.
Наіўнасьць і чыстаплюйства заходніх палітыкаў часам проста зашкальвае. Вось літаральна нядаўна (з нагоды зьяўленьня ў ЗША групы Ціханоўскай) экс-памочнік дзяржсакратара ЗША дасьледчык Міжнароднага ўнівэрсытэту Фларыды Дэйвід Крэймэр гэтак сказаў пра санкцыі : "На Лукашэнку трэба ціснуць, пакуль ён ня сыйдзе". Вось такія "cпэцы" з думаньнем палітычных гамункулусаў, што 70 гадоў ціснулі на калектыўнага Кім-Чэн-Ына, цяпер даюць парады беларусам пра санкцыі "супраць Лукашэнкі" (які, маўляў, павінен спалохацца і сыйсьці). Чым можа скончыцца санкцыйная палітыка, я ўжо казаў ня раз -- зьбядненьнем насельніцтва, масавымі рэпрэсіямі супраць беларусаў, разбурэньнем краіны і захопам Беларусі Расеяй голымі рукамі, без адзінага стрэлу.
Трэба зьвярнуць увагу на пагрозу Макея зьнішчыць грамадзянскую супольнасьць у Беларусі ў выпадку, калі Захад увядзе эканамічныя сістэмныя санкцыі. Гэтая заява алагічная. Пры чым тут "супольнасьць"? Навошта такім незьвязаным чынам пагражаць Захаду?
Пагроза сьведчыць аб планах Лукашэнкі і яго асяроддзя. Яны пралічылі (гледзячы на іншыя рэжымы), што пазьбегнуць рэвалюцыі і нябясьпекі для ўлады можна тады, калі зьнішчыць ў краіне грамадзянскую супольнасьць, ліквідаваць актыўных патрыятычных людзей, пасадзіць іх надоўга ў турму, выгнаць за мяжу, а просты народ запалохаць. Але паколькі гэта справа злачынная, то яны няўклюдна паспрабавалі яе замаскаваць, зьвязаўшы з санкцыямі, думаючы ўскосна абвінаваціць Захад. Маўляў, ня ўводзілі б санкцыі -- не было б рэпрэсій. Мы ж папярэджвалі. Такое ёсьць хітрадумства крымінальнай палітыкі. Але рэпрэсіі шырокамаштабна робяцца і ўвесь час пашыраюцца. Беларускі народ нішчаць з абодвух бакоў.
Па інфармацыі, якую я атрымаў тут, будучы ў Варшаве, групу Ціханоўскай быццам бы запрашаюць ў Беларускую Аўтакефальную Праваслаўную Царкву ў Нью Ёрку, але гэта ўсё робіцца авантурна. Відаць, скандалу ў Варшаве зь візітам Ціханоўскай да Тшаскоўскага было замала.
28 views04:16
К
