УШАНУЙМА СВЯТУЮ ПЛАШЧАНІЦУ ХРЫСТА 4 траўня – дзень ушанавання | Грэка-католікі Беларусі

УШАНУЙМА СВЯТУЮ ПЛАШЧАНІЦУ ХРЫСТА

4 траўня – дзень ушанавання святой Плашчаніцы Ісуса Хрыста

Ужо больш за паўтысячагоддзя, у дзень 4 траўня адзначаецца дзень Ушанавання святой Турынскай Плашчаніцы.
Папа Рымскі Юлій II, 516 гадоў таму - 26 красавіка 1506 г. зацвярдзіў тэксты святой Імшы і Літургіі гадзінаў (брэвіярыя) на свята ўшанавання гэтай каштоўнай Рэліквіі і звяртаў увагу на сувязь паміж Крыжам і Святой Плашчаніцай.
Свята было прызначанае на 4 траўня, гэта значыць на наступны дзень пасля свята «знаходжання святога Крыжа».

Свята ўшанавання святой Плашчаніцы Хрыста адзначаецца асабліва ўрачыста ў Турыне, дзе яна захоўваецца. Там жа – у пабожных пілігрымках - прыбываюць з усяго свету вернікі розных традыцыі і канфесій.

Поўнамашабная копія Турынскай Плашчаніцы (якая была прыкладзеная да святой Рэліквіі) ўжо шмат гадоў выстаўленая ў касцёле святых Сымона і Алены ў Мінску – для малітоўнага пакланення вернікаў розных абрадаў і канфесій.

+++
Багаслужбовыя тэксты візантыйскай традыцыі, якія можна выкарыстаць пры ўшанаванні Плашчаніцы

+Высакародны Язэп зьняў з дрэва ўсячыстае цела Тваё
і, спавіўшы яго ў чыстае палатно
з духмянасьцямі, у магіле новай паклаў.

+Устаўшы да сьвітаньня, жанчыны, што былі з Марыяй,
убачылі камень, адвалены ад магілы, і пачулі ад анёла:
"Нашто шукаеце сярод мёртвых, быццам чалавека,
Таго, хто жыве ў вечным сьвятле?
Гляньце, вось пахавальныя покрывы;
дык ідзіце і сьвету абвяшчайце,
што Госпад уваскрос і зьнішчыў сьмерць,
бо Ён Сын Бога, які збаўляе род людзкі".

+Хрыстос уваскрос з мёртвых, сьмерцю сьмерць зваяваў
і тым, што ў магілах, жыцьцё дараваў.

+Убачыўшы ўваскрасеньне Хрыстова,
паклонімся сьвятому Госпаду Ісусу, адзінаму бязгрэшнаму.
Крыжу Твайму пакланяемся, Хрысьце,
і сьвятое ўваскрасеньне Тваё ў песьнях славім.
Ты – Бог наш, апроч Цябе іншага бога ня знаем, імя Тваё клічам.
Прыйдзіце, усе верныя, паклонімся сьвятому ўваскрасеньню Хрыстоваму,
бо праз крыж прыйшла радасьць усяму сьвету.
Заўжды бласлаўляючы Госпада, славім ўваскрасеньне Яго,
бо Ён, пацярпеўшы ўкрыжаваньне, сьмерцю сьмерць зваяваў.

+Хоць Ты, Несьмяротны, і зышоў у магілу,
Ты зьнішчыў пекла ўладу і ўваскрос пераможна, Хрысьце Божа,
жанчынам міраносіцам кажучы "Радуйцеся",
і Тваім апосталам супакой даруючы,
Ты, што даеш памерлым уваскрасеньне.

+У магіле целам, у пекле душою як Бог, у раі з разбойнікам, і на пасадзе разам з Айцом і Духам Ты быў, Хрысьце: Ты ўсё напаўняеш, Неабдымны.