2022-08-30 13:05:49
Свята пісьменства – на тэлеканале «Беларусь 3» і ў радыёэфіры
Сёлета 3 і 4 верасня горад Добруш Гомельскай вобласці прымае эстафету ўрачыстасцей, прысвечаных Дню беларускага пісьменства. Трансляцыі канцэртаў форума і тэматычную праграму перадач прапануе ў гэтыя дні сацыякультурны тэлеканал медыяхолдынга, асаблівы эфір рыхтуе і Беларускае радыё.
Штогод з 1994-га свята пісьменства, якое традыцыйна адзначаецца ў першую нядзелю верасня, вандруе па гістарычным цэнтрам беларускай культуры. Здымачная група «Беларусь 3» наведае ўсе пляцоўкі форума ў Добрушы, сустрэнецца з гасцямі і выступоўцамі, пакажа, як ушаноўваецца гісторыка-культурная і духоўная спадчына края ў выпусках «Навін культуры». Аднаму з сакральных сімвалаў горада – храму Святога Мікалая – будзе прысвечана праграма «Святыні Беларусі».
У суботу
3 верасня на тэлеканале адбудзецца трансляцыя ўрачыстай цырымоніі адкрыцця Дня беларускага пісьменства – пачатак у 21:00. У нядзелю
4 верасня ў 14:00 гледачы ў прамым эфіры ўбачаць канцэрт закрыцця форума.
На працягу двух дзён праграма «Беларусь 3» будзе складацца з мастацкіх фільмаў айчыннай вытворчасці, спектакляў і канцэртаў паводле твораў беларускіх літаратараў. Аб жыцці і творчасці класікаў і сучасных мастакоў слова раскажуць дакументальныя і партрэтныя праекты «Люблю і памятаю», «Суразмоўцы», «Кадры жыцця» і спецыяльны цыкл да 140-годдзя Янкі Купалы «Па слядах Купалы».
У тэматычнай падборцы мастацкіх стужак на ўсе выхадныя – народныя кінахіты «Дзікае паляванне караля Стаха», «Вазьму твой боль», «Дрэвы на асфальце» і «Белыя росы», а самым маленькім тэлегледачам канал прапануе распачаць нядзельную раніцу з прагляда мультфільмаў «Магістр вольных мастацтваў. Францыск Скарына» і «Я тайну ў глыбіні душы хаваю… Максім Багдановіч».
Пачуць і ўбачыць музыкальнае і тэатральнае ўвасабленне спадчыны класікаў літаратуры можна будзе ў суботу – у тэлеверсіі канцэртнай праграмы да 130-годдзя Максіма Багдановіча і спектаклі Нацыянальнага акадэмічнага драматычнага тэатра імя Якуба Коласа «Леаніды не вернуцца на зямлю» паводле Уладзіміра Караткевіча.
На Першым нацыянальным канале Беларускага радыё, канале "Культура", радыёстанцыі "Сталіца" і Міжнародным радыё "Беларусь" плануюцца прамыя уключэнні са святочных пляцовак, інтэрв'ю з удзельнікамі, гасцямі і гаспадарамі свята.
Асаблівы падарунак да Дня беларускага пісьменства падрыхтаваў заслужаны калектыў ансамбль народнай музыкі "Бяседа" Белтэлерадыёкампаніі, які парадуе сваіх прыхільнікаў новымі і любімымі творамі на роднай мове
56 views10:05
Р
