Верш Ганны Севярынец «Трымаймася поплеч, трымайма шэраг, не пе | Воложин Новости
Верш Ганны Севярынец«Трымаймася поплеч, трымайма шэраг, не перарывайма ланцуг».
З фізікі мала што ацалела У галаве, што жыве паміж слоў і строф. Але помню намёртва пра тое, што цела, Чалавечае цела праводзіць ток. Няма перашкоды, ні меж, ні меры Для гэтага збегу вачэй і рук, Трымаймася поплеч, трымайма шэраг, Не перарывайма ланцуг. І ў гэтым напружанні дзікае сеткі, Калі замыкае і рве з павек, Гарыць і сплывае кожная клетка, Але не спыняецца гэты бег. Некага выб'е, некага зломіць, Нехта не вытрывае і ўпадзе, Але на апошняе ў зубы схопіць Той провад, у якім наша праўда йдзе. Нас не пазнаць у гэтым страшным годзе. Даўно перавышаны болю парог. Мы не сыходзім. Мы не сыходзім. Мы праводзім, праводзім ток.