Вясна / Правы чалавека ў Беларусі

2021-07-05 15:15:00 Дзесяці палітвязням пракурор запрасіў ад пяці да дзевяці гадоў калоніі

Усіх іх вінавацяць ва ўдзеле ў телеграм-чаце «радыкальнага напрамку». У паказаннях фігуруюць некалькі чатаў — у прыватнасці, «ОГСБ» (Отряд гражданской самообороны), «Подработка Минск», «100», «101». Акрамя гэтага — у намеры пашкодзіць або знішчыць тры «Табакеркі». Некалькі палітвязняў заявілі аб катаваннях падчас затрымання або напісання «чыстасардэчных прызнанняў».

Пракурор Аляксандр Рамановіч запрасіў для ўсіх абвінавачаных пазбаўленне волі ў калоніі ўзмоцненага рэжыму — 80 гадоў зняволення на ўсіх.

Падрабязнасці bit.ly/2UkiBwC Адкрыць / каментаваць

2021-07-05 15:00:56 Выступ спецыяльнага дакладчыка па пытанні аб становішчы ў галіне правоў чалавека ў Беларусі Анаіс Марэн

Сёння з 16:00 да 17:30 на 47 сэсіі Савета па правах чалавека ААН выступіць спецдакладчык па пытанні аб становішчы ў галіне правоў чалавека ў Беларусі Анаіс Марэн.

Глядзець выступ анлайн

Даклад Спецдакладчыка па пытанні аб палажэнні ў вобласці правоў чалавека ў Беларусі Анаіс Марэн, які будзе прадстаўлены на 47 сесіі Савета па правах чалавека Адкрыць / каментаваць

2021-07-05 14:36:05 Стан здароўя палітвязняволенай Юліі Чарняўскай, якая другі месяц знаходзіцца пад хатнім арыштам па «Справе TUT.ВY», значна пагоршыўся

Ёй неабходныя медыцынскае абследаванне і догляд лекараў, якія ва ўмовах цяперашняй меры стрымання атрымаць немагчыма. Абарона Юліі будзе настойваць на замене хатняга арышту на асабістае даручальніцтва або падпіску аб нявыездзе, піша @tutby_official Адкрыць / каментаваць

2021-07-05 14:30:49 Палітвязня Мікалая Дзядка хочуць абвінаваціць яшчэ па артыкуле 130 Крымінальнага кодэкса?

Працягваецца суд па крымінальнай справе супраць 32-гадовага палітзняволенага блогера і актывіста анархічнага руху Мікалая Дзядка. Яго затрымалі 11 лістапада, моцна збілі і выставілі абвінавачванне па трох артыкулах Крымінальнага кодэкса: арт. 342,арт. 361,арт. 295-3.

Сёння пракурор Антон Цюменцаў папрасіў правесці экспертызу пастоў тэлеграм-канала Мікалая на выказванні ўзбуджаючага характару да адной групы асобы па адносінах да іншай групы асобаў аб'яднаных прафесійнай дзейнасцю. Гэта выходзіць за межы абвінавачвання і закранае артыкул 130 КК (распальванне расавай, нацыянальнай, рэлігійнай альбо іншай сацыяльнай варожасці або варожасці). Суддзя ўзяла час на вырашэнне гэтага хадайніцтва — аб'яўлены перапынак да заўтра.

Падрабязнасці bit.ly/3AwdB8E

Душылі падушкай, засоўвалі бутэльку ў рот. На судзе палітвязень Дзядок распавёў пра катаванні і збіццё Адкрыць / каментаваць

2021-07-05 14:21:47 У ІЧУ Брэста з-за каранавіруса перасталі прымаць перадачы Адкрыць / каментаваць

2021-07-05 13:42:25 На гэтым тыдні свой Дзень Народзінаў адзначаюць дзесяць палітвязняў:

Вікторыя Гранкоўская
Вольга Залатар 
Іван Ракіць
Віктар Іванцоў 
Міхаіл Калішук  
Уладзіслаў Зяневіч
Дзмітрый Караткевіч
Аляксандр Міронаў
Тамаз Піпія
Сяргей Спарыш

Самы просты спосаб павіншаваць палітзняволеных – адправіць паштоўку. Гэта можна зрабіць і праз Майстэрню паштовак. Адкрыць / каментаваць

2021-07-05 13:10:07 Прафайл Беларусі ў штогадовым замеры Індэкса забароны катаванняў

Нагадаем, працоўная група па барацьбе з катаваннямі Платформы «Грамадзянская салідарнасць» прадставіла другі штогадовы замер Індэкса забароны катаванняў

Ён лічыўся па кожнай краіне і ўтрымліваў ацэнкі дзяржаўнага механізму рэагавання на катаванні, судовага кантролю, наяўнасці нормаў у нацыянальным заканадаўстве, якія забараняюць катаванні, узроўню забеспячэння працэсуальных гарантый, якія працуюць на прэвенцыю катаванняў, працуючых у краіне механізмаў і сродкаў прэвенцыі катаванняў, ступені прыняцця дзяржавай міжнародных абавязацельстваў у галіне забароны катаванняў.

Дакумент цалкам bit.ly/2UJOpLv Адкрыць / каментаваць

2021-07-05 12:39:30 Гародня: Адзінаццаць пацярпелых амапаўцаў блытаюцца ў паказаннях, суд здымае матэрыяльныя пазовы

Працягваецца разгляд крымінальнай справы Андрэя Сакалоўскага. якога вінавацяць па некалькіх артыкулах Крымінальнага кодэксу. Нібыта ён «знаходзіўся ў счэпцы, аказаў відавочнае непадпарадкаванне супрацоўнікам АМАПа і меў намер прычыніць боль 11 пацярпелым амапаўцам». Андрэй сябе вінаватым не прызнае.

На пасяджэннях амапаўцы блытаюцца ў паказаннях, супярэчаць сваім ранейшым паказанням, адмаўляюцца ад сваіх ранейшых матэрыяльных патрабаванняў да абвінавачванага.

Падрабязнасці bit.ly/3qKTuzf Адкрыць / каментаваць

2021-07-05 12:08:52 Старшыню Партыі БНФ Рыгора Кастусёва перавялі з ацёкамі і праблемамі сэрца з СІЗА КДБ ў турэмны шпіталь на Валадарцы, піша @nashaniva. Адкрыць / каментаваць

2021-07-05 12:00:16 Пенсіянерку, якая паведаміла пра затрыманне дэлегаткі «Сходу», арыштавалі на 11 сутак

30 чэрвеня на сваёй старонцы ў фэйсбуку 61-гадовая Ала Спосаб паведаміла пра затрыманне дэлегаткі “Сходу” Вольгі Казановіч. Пры гэтым, яна дадала, што калі яе не будзе ў фэйсбуку, то яе затрымалі. Так і здарылася, але толькі на наступны дзень. Ала вярталася дадому з прадуктовай крамы, калі да яе падыйшлі міліцыянты, спыталі прозвішча і імя, а потым прапанавалі праехаць у Фрунзенскі РУУС. Ёй нават не дазволілі занесці дадому прадукты. У РУУС жанчыну адвезлі для «прафілактычнай гутаркі» з-за інфармацыі аб тым, што Ала раней прымала ўдзел у несанкцыянаваных масавых мерапрыемствах. Але ў РУУСе на пенсіянерку склалі пратакол па арт. 19.1 КаАП за дробнае хуліганства. Згодна з пратаколам, яна «ў службовым кабінеце №24 Фрунзенскага РУУСа, парушая грамадскія правілы і нормы паводзінаў, наўмысна ажыццяўляла дзеянні, а менавіта: паводзіла сябе агрэсіўна і выклікаючы, рукой скінула прыналежнасці са стала, перавярнула крэсла, на заўвагу супакоіцца не рэагавала».

2 ліпеня справу Алы Спосаб разглядзела суддзя Фрунзенскага раёна Марыя Ярохіна. На судзе дапыталі сведку-міліцыянта, які сцвярджаў, што затрымліваць пенсіянерку ніхто не збіраўся, а хацелі толькі пагутарыць і адпусціць дадому. Але «негледзячы на ўсе просьбы супакоіцца, жанчына працягвала паводзіць сябе агрэсіўна». Па яго словах, Алу даставілі ў РУУС каля 19:45, правялі яе ў кабінет №24, дзе пачалі тлумачыць пра тое, якія змены былі ўнесены ў КаАП, аб адказнасці, якая прадугледжана за ўдзел у несанкцыянаваных масавых мерапрымствах. Падчас гутаркі Ала нібыты стала паводзіць сябе агрэсіўна, з выклікам, пачала крычаць: «Чаму я тут знаходжуся, выпусціце мяне». Яна пачала махаць рукамі, скінула пісьмовыя прыналежнасці са стала. Ёй некалькі разоў тлумачылі, што дадзеныя дзеянні могуць кваліфікавацца як дробнае хуліганства, але на заўвагу яна не адрэагавала, а працягвала махаць рукамі, зачапіла крэсла і яно перакулілася. Пасля чаго міліцыянты вырашылі заводзіць адміністрацыйную справу.

Ала Спосаб растлумачыла суду, што нават не памятае, як там крэсла ўпала. Па словах пенсіянеркі, у яе дыябет, таму калі яна доўга не прымае ежу, то ў яе нямеюць пальцы, ад чаго ў яе магла ўпасці ручка. За гэта жанчына некалькі разоў прасіла прабачэнне. Яна падкрэсліла, што яна настаўніца, таму за доўгія годы працы ў яе выпрацавалася такая манера размовы, на якую некаторыя крыўдзяцца.

Суддзі Ярохінай паказанняў сведкі хапіла, каб прызнаць Алу вінаватай і арыштаваць яе на 11 сутак. Адкрыць / каментаваць

2021-07-03 20:21:06 Праваабарончаму цэнтру «Вясна» стала вядома пра затрыманне мінчука Івана Лобырава. На лецішча, дзе знаходзіўся мужчына, прыехалі супрацоўнікі ў масках, правялі ператрус без панятых і затрымалі мужчыну. У чым яго вінавацяць — невядома, бо нікога побач не было.

Таксама паведамляецца, што сёння ў Століне быў затрыманы Павел Рабешка. Па месцы жыхарства мужчыны таксама правялі вобшук, у якім, па інфармацыі, прымалі ўдзел пяць супрацоўнікаў міліцыі. Быў канфіскаваны тэлефон, а самаго Паўла затрымалі і звезлі ў невядомым напрамку. Што стала падставай для прыезду супрацоўнікаў — пакуль невядома.

У Брэсце затрыманыя Дзмітрый і Юлія Велясніцкія.

Хроніка палітычнага пераследу 3 ліпеня bit.ly/3qNMYrA

Аператыўна паведаміць пра затрыманне можна ў нашым тэлеграм-боце @viasna_bot Адкрыць / каментаваць

2021-07-03 17:30:02 ААН заклікае дасылаць інфармацыю аб парушэннях правоў чалавека ў Беларусі

Упраўленне Вярхоўнага камісара ААН па правах чалавека зацікаўленае ў атрыманні інфармацыі, якая тычыцца ўсіх меркаваных парушэнняў правоў чалавека, учыненых у Беларусі з 1 траўня 2020 года, уключаючы магчымыя гендэрныя аспекты такіх парушэнняў.

У арганізацыі абавязваюцца не раскрываць вашу асобу або выкарыстоўваць прадстаўленую інфармацыю толькі з дазволу, а таксама кіравацца прынцыпам «не нашкодзь»: не падвяргаць небяспецы жыццё, бяспеку, свабоду і дабрабыт ахвяраў, сведак і іншых асобаў, якія супрацоўнічаюць.

Падрабязнасці bit.ly/2TwI2em Адкрыць / каментаваць

2021-07-03 15:38:50 Цімура Газізава затрымалі адразу пасля заканчэння 15-сутачнага арышту. Ён зноў за кратамі

1 ліпеня Цімур Газізаў павінен быў выйсці на волю пасля 15-сутачнага арышту. Тады яго затрымалі на спектале ў Чырвоным Дворыку. Але Цімура з ЦІПа так і не выпусцілі, бо супрацоўнікі ГУБАЗіКа каля 19:00 павезлі яго дадому для правядзення ператрусу.

2 ліпеня судовы працэс супраць Газізава вяла суддзя Ленінскага раёна Юлія Інчына. У пачатку працэсу мужчына заявіў, што нават не азнаёмлены з матэрыяламі яго справы. Суддзі Інчынай з-за дрэннай сувязі давялося тройчы зачытаць пратакол па арт. 24.3 КаАП, згодна з якім «1 ліпеня каля 22:00 будучы падобным па прыкметах да асобы, якая знаходзіцца ў вышуку Ленінскага РУУСа за здзейсненае злачынства, прадугледжанае арт. 339 КК, здзейсненае 20 жніўня на тэрыторыі Ленінскага раёна, на неаднаразовыя просьбы прадаставіць дакументы, адказваў катэгарычнай адмовай, чым аказаў непадпарадкаванне супрацоўнікам міліцыі». Віну сваю Газізаў не прызнаў і нават не зразумеў аб якім злачынстве ідзе гаворка, бо чуў гэта ўпершыню.

Адвакат хадайнічаў аб выкліку маці Газізава ў якасці сведкі, для доказу таго, што супрацоўнікі Ленінскага РУУСа прысутнічалі пры ператрусе і таму асоба Газізава была ўстаноўленая, а падставаў патрабаваць ад яго прадастаўлення дакументаў не было. Суддзя Інчына ў хадайніцтве адмовіла.

Газізаў таксама хадайнічаў аб выкліку ў якасці сведкі выпускніцу Кацярыну Віннікаву, асуджаную ў той жа дзень, бо яна знаходзілася разам з Цімурам у РУУСе.

Супрацоўнікі ГУБАЗіКа прапаноўвалі Газізаву падпісаць дакументы аб "недапушчальнасці ўдзелу ў масавых мерапрыемствах".

На судзе Цімур распавёў, што адбылося 1 ліпеня насамрэч:
«А 19:00 у мяне скончыўся арышт і пасля таго, як я атрымаў свае асабістыя рэчы, мяне пад рукі ўзялі тры супрацоўнікі ГУБАЗіКа, а дакументы яны свае не паказалі. Сілавікі запатрабавалі праехаць з імі для правядзення ператрусу. Праз 15 хвілін у кватэры раптам з'явіліся два новыя супрацоўнікі, якія не прадставіліся і прыступілі да ператрусу. На кепцы аднаго з супрацоўнікаў было напісана “Ленінскае РУУС". Вопісаў рэчаў ніякіх не рабілі. Усяго ў кватэры было 5 супрацоўнікаў міліцыі. Супрацоўнікі ГУБАЗіКа адмовілі мне ў выкліку адваката, а для мяне гэта было вельмі важна. Каля 20:30 мяне прывезлі ў РУУС, дзе мне зноў адмовілі ў адвакаце. Я сядзеў спакойна, паводзіў сябе вельмі асцярожна. Каля 22:00 супрацоўнік Зайцаў мне сказаў: «Мне ўсё роўна, хочаш ты падпісваць ці не, я зраблю ўсе 60 подпісаў за цябе і напішу "адмову"». Ён пры мне дэманстратыўна пачаў падпісваць усе дакументы гэтым словам. Я не буду рабіць нешта, з-за чаго мог бы вярнуць зноў туды на суткі. Сэнс іх слоў быў у тым, што яны мяне, калі захочуць, то пасадзяць. Я зразумеў, што ў іх ёсць да мяне асабістая непрыязнь. Мне яшчэ ў мінулым годзе начальнік Ленінскага РУУСа г. Мінска палкоўнік міліцыі Капілевіч Віталь Вітальевіч казаў, што ў мяне будуць праблемы. А 20:30 маю асобу ўжо дакладна ведалі. Супрацоўнік Зайцаў мне зноў сказаў, што я яму нават не патрэбны, каб мяне пасадзіць».

Адвакат звяртае ўвагу суда, што Газізава не азнаёмілі ні з адным дакументам і асобу яго не ўстанаўлівалі. Сведку-міліцыянта на судзе Цімур не пазнаў, і сам сведка таксама не змог апісаць мужчыну, але затое пацвердзіў паказанні ў пратаколе. Суддзя Інчына адмовіла ў выкліку ўсіх сведак з боку абароны.

Адвакат назваў гэты працэс тэатрам абсурду, бо няма такога закона, які прадугледжваў бы пакаранне за адмову прадставіцца нават супрацоўніку міліцыі, таму што гэта асабістае права, а не абавязак. Ён заявіў, што яго падабаронны затрыманы незаконна і гэта прамое парушэнне правоў Газізава. Гэтак жа незаконныя пратаколы і дзеянні супрацоўнікаў міліцыі. Галоўным парушэннем стала адмова ў праве на абарону.

У выніку, нягледзячы на грубыя памылкі ў справе, у адмове выкліку адваката падчас ператрусу, ілжэсведчанне міліцыянта, на поўнае неадпаведнасць нормаў пратакола, суддзя Юлія Інчына арыштавала Газізава яшчэ на 15 сутак. Адкрыць / каментаваць

2021-07-03 15:09:05 "Я за мірную і квітнеючую Беларусь". У судзе па "справе студэнтаў" дапыталі частку абвінавачаных

У судзе Савецкага раёну Мінску 1 і 2 ліпеня крымінальны працэс па "справе студэнтаў" працягваўся допытам абвінавачаных.

На судзе выступілі Ілля Трахтэнберг, Глеб Фіцнер, Вольга Філатчанкава, Ася Булыбенка ды Таццяна Якельчык. Ягор Канецкі даваць паказанні адмовіўся.

Пра што яны казалі bit.ly/3dBorQP Адкрыць / каментаваць

2021-07-02 19:51:16 Журналіст Аляксандр Івулін стаў падазраваным па крымінальнай справе.

Яго перавялі ў СІЗА, піша @tribuna_by

Аляксандра падазраюць па 342-м артыкуле КК РБ – арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Яму можа пагражаць да трох гадоў турмы. Адкрыць / каментаваць

2021-07-02 19:40:00 Па ўсёй краіне працягваюцца суды за абразы і паклёп на прадстаўнікоў улады

Па дадзеных праваабаронцаў, самымі распаўсюджанымі крымінальнымі інструментамі рэпрэсій сёння з’яўляецца пераслед па дыфамацыйных артыкулах: абраза прадстаўнікоў улады, суддзяў, міліцыянтаў, прэзідэнта (арт. 368, 369, 391 КК).

2,5 гады «хіміі», тры тысячы — міліцыянтам. У Магілёве новы прысуд за абразу міліцыянтаў;

Год «хатняй хіміі» і 900 рублёў кампенсацыі за каментар «Панабіраюць ідыётаў»;

Два гады «хатняй хіміі» за каментар «Мусорской хряк». Абвінавачаны не памятае, ці пакідаў яго;

Два гады «хіміі» і паўтары тысячы кампенсацыі за каментар «сй гк»;

Асуджанаму раней па артыкуле 342 КК жыхару Маладзечна «прысудзілі яшчэ і «хатнюю хімію».

«Вясна» распавядае, каго і за што за гэты тыдзень асудзілі ў Беларусі па гэтых артыкулах bit.ly/3ygnd5x Адкрыць / каментаваць

2021-07-02 18:44:32 Мінская гарадская калегія адвакатаў распачала дысцыплінарную вытворчасць у дачыненні да адваката Дзмітрыя Лаеўскага

Пра гэта Дзмітрый паведаміў у сваім тэлеграм-канале.

«У судовых спрэчках у абарону Віктара Бабарыкі я абгрунтаваў адсутнасць прыкмет злачынства ("атрыманне хабару") у дзеяннях іншых абвінавачаных, выказаў нязгоду з іх пазіцыяй і заявіў аб неабходнасці іх апраўдання. Пра гэта ж гаварыў у сваіх паказаннях мой падабаронны, чыю пазіцыю я, як абаронца, падтрымліваў і адстойваў. Рабіў гэта добрасумленна і прынцыпова».

Таксама ён падкрэсліў, што «аспрэчваць пазіцыю іншых удзельнікаў працэсу, асабліва калі яна выкарыстоўваецца для абвінавачвання майго падабароннага, ні закон, ні правілы прафэтыкі не забараняюць».

Хроніка палітычнага пераследу 2 ліпеня bit.ly/3xdGEMl Адкрыць / каментаваць

2021-07-02 18:01:25 Мінчука судзяць за ўдзел у Маршы. Пазоў «Мінсктранса» — больш за 60 тысяч рублёў

45-гадовага Андрэя Абразцова абвінавачваюць ва ўдзеле ў Маршы 25 кастрычніка — нібыта ён «парушаў спакой грамадзян, публічна выкрыкваў лозунгі з "нецэнзурнай лаянкай", здзяйсняў громкія плясканні ў ладоні, рухаючыся па праезнай частцы, размахваў рукамі і бела-чырвона-белым сцягам».

«Мінсктранс» выставіў мужчыне пазоў на 62 тысячы 96 рублёў 66 капеек.

Падрабязнасці bit.ly/2SO5CmA Адкрыць / каментаваць

2021-07-02 17:08:59 Супраць спявачкі Анжалікі Агурбаш распачалі крымінальную справу за распальванне варожасці і абразу Лукашэнкі

Па словах Анжалікі, у дачыненні да яе распачатая крымінальная справа па ч.3 арт. 130 КК (Распальванне варожасці або розні), які прадугледжвае да 12 гадоў пазбаўлення волі, і ч. 2 арт. 368 КК (Абраза прэзідэнта) — да трох гадоў. Яе абвясцілі ў вышук, піша @tutby_official Адкрыць / каментаваць

2021-07-02 17:03:03 «Выказала падзяку Максіму Знаку, чым парушыла правілы правядзення масавых мерапрыемстваў». Выпускніцу юрфаку БДУ Кацярыну Віннікаву арыштавалі на 15 сутак

29 чэрвеня на цырымоніі ўручэння дыпломаў Кацярына Віннікава выступіла з натхняльнай прамовай, у якой падзякавала юрыстам і выкладчыкам, сярод якіх быў і палітвязень Максім Знак. 1 чэрвеня ў дзяўчыны ў інтэрнаце правялі ператрус і канфіскавалі ноўтбук, а яе саму дапытвалі некалькі гадзінаў у РУУСе, прычым адваката падчас допыту не пусцілі. У Ленінскім РУУСе на Кацярыну склалі пратакол па арт. 24.23 КаАП за несанкцыянаванае пікетаванне.

2 ліпеня справу Кацярыны Віннікавай разглядзелі ў судзе Ленінская раёна. Судзіла дзяўчыну Марына Клімчук. Згодна з пратаколам, Віннікава «правяла пікетаванне шляхам выказвання грамадзка-палітычных поглядаў, выступала на сцэне супраць пераследу юрыстаў». Кацярына сваю віну не прызнала.

Па словах Віннкавай, на ўручэнне дыплома былі запрошаныя ўсе студэнты 4 курса з мэтай уручэння дыпломаў, а сама цырымонія пачыналася ў 18:00. Было прапанавана лепшым студэнтам выступіць з падзячнай прамовай, таму яна, як чырвонадыпломніца, выйшла на сцэну з падзячнай прамовай. Яна тлумачыць, што выступала з удзячнасцю выкладчыкам, а Максіма Знака згадала толькі адзін раз. Суддзя запытала, які сэнс укладвала дзяўчына ў сваю прамову, на што тая адказала: «Дзякавала настаўнікам і тым, хто ўкладваў свае сілы і атрымаў дыплом юрфака БДУ». Кацярына адмаўляе, што такім чынам выказвала сваю палітычную пазіцыю, і нагадвае, што яна выходзіла не па ўласнай ініцыятыве, а гэта толькі было часткай праграмы.

На судзе выступілі выкладчыкі і студэнты БДУ, якія пацвердзілі, што прозвішча Знака Кацярына назвала толькі адзін раз. Усе характарызуюць яе толькі са станоўчага боку. У рапарце супрацоўніка міліцыі сказана, што "падчас маніторынгу інтэрнэту знайшоў запіс на якім відаць, што Віннікава, выступаючы са сцэны, выказала падзяку Максіму Знаку, чым парушыла правілы правядзення масавых мерапрыемстваў, а таксама была ў белай сукенцы з чырвоным поясам".

Суддзя Клімчук адхіліла хадайніцтвы адваката аб тым, каб далучыць да матэрыялаў справы каталогі дзвюх крам, з такімі жа сукенкамі, а таксама фатаграфіі беларускіх хакеістаў у бел-чырвона-белых расфарбоўках.

У выніку, суддзя Клімчук прызнала выпускніцу юрфаку БДУ вінаватай і арыштавала яе на 15 сутак. Адкрыць / каментаваць

2021-07-02 16:45:12 ​​У судзе Цэнтральнага раёну Гомеля сёння асудзілі журналіста-фрылансера Андрэя Толчына.

Яго затрымалі 24 чэрвеня пасля здымкаў каля СІЗА №3 перад працэсам над Міколам Статкевічам, Сяргеем Ціханоўскім, Дзмітрыем Паповым, Арцёмам Сакавым, Ігарам Лосікам і Уладзімірам Цыгановічам. Журналіста даставілі ў РАУС, дзе пратрымалі 7 гадзін ды склалі пратакол па 23.5 КаАП РБ (незаконны выраб і распаўсюд прадукцыі СМІ).

На суддзе Андрэй Толчын заявіў, што быў на вуліцы Кніжнай, зняў на відэа будынак суда, запісаў жонку Статкевіча і амбасадараў. Пасля на плошчу Паўстання пад’ехаў бус, журналіста затрымалі, пры гэтым міліцыянты брудна лаяліся і пашкодзілі Андрэю нагу, піша @viasnaHomel

“Міліцыянты сказалі, што маюць загад. У мяне быў бэйджык, дзе напісана, што я фрылансер і паводле Канстытуцыі маю права збіраць інфармацыю. Віну не прызнаю, бо не вырабіў прадукт СМІ”, — заявіў у судзе Толчын.

Аднак суддзя Сяргей Салоўскі палічыў віну журналіста даказанай і пакараў яго штрафам у памеры 30 базавых велічынь (870 рублёў). Таксама суд пастанавіў канфіскаваць у Андрэя Толчына ўсю тэхніку — штатыў, камеру, карткі памяці ды мікрафон. Адкрыць / каментаваць

2021-07-02 15:30:24 У судзе па "справе студэнтаў" другі дзень адбываецца допыт абвінавачаных.

Сёння пасля абеду паказанні давала Таццяна Якельчык. Дзяўчына не прызнала сваёй віны ў дзеяннях, што груба парушаюць грамадскі парадак, і напрыканцы выступу сказала:
"Я наадварот, за мірную і квітнеючую Беларусь".

Слухачы ў залі заапладзіравалі.

Пасля гэтага суддзя Марына Фёдарава выдаліла ўсіх прысутных з пасяджэння. Адкрыць / каментаваць

2021-07-02 14:50:05 Вынеслі прысуды антыфашыстам, якіх вінавацілі ва ўдзеле ў массавых беспарадках (ч. 2 арт. 293 КК), групавых дзеянняў, што груба парушаюць грамадскі парадак (ч. 1 арт. 342 КК) і гвалце над супрацоўнікамі міліцыі (арт. 364 КК).

Суддзя Святлана Бандарэнка палічыла віну усіх фігурантаў справы даказанай і прызначыла пакаранне ў выглядзе пазбаўлення волі з яго адбыццём ва ўмовах узмоцненнага рэжыму:
Віталю Шышлову і Дзянісу Болтуцю — тэрмінам на 6 гадоў кожнаму;
Цімуру Піпія — тэрмінам на 6 гадоў, 3 месяцы і 2 дні;
Тамазу Піпія — тэрмінам на 5 гадоў.

Менавіты такія тэрміны запрасіў для абвінавачаных пракурор Раман Бізюк.

Таксама суд пастанавіў спагнаць ў салідарным парадку з Шышлова, Болтуця і Цімура Піпія кампенсацыю прычыненай шкоды пацярпелым міліцыянтам: Зелянеўскаму — 1000 рублёў, Карабанаву — 500 рублёў.

Сёння ў судзе хлопцы былі зноў са скаванымі кайданкамі за спіной рукамі, пасля прысуду іх выводзілі з залі амаль у позе “ластаўкі”.

Падрабязнасці bit.ly/3hvXQFZ Адкрыць / каментаваць

2021-07-02 14:29:26 На Берасцейшчыне затрымана не меньш за 12 чалавек

«Вясне» вядома пра затрыманне шасці чалавек у Кобрыне, трох — у Брэсце і Пружанах.

Праваабаронцам таксама паведамілі пра затрыманне ў Мінску Сяргея Трусава.

Хроніка палітычнага пераследу 2 ліпеня bit.ly/3xdGEMl

Аператыўна паведаміць пра затрыманне можна ў нашым тэлеграм-боце @viasna_bot Адкрыць / каментаваць

2021-07-02 14:18:37 У судзе Маскоўскага раёна Брэста падчас спрэчак бакоў па абвінавачванні другой партыі фігурантаў “пінскай справы” пракурор запрасіў тэрміны ад 4 да 5,5 гадоў.

Ён прасіў суд прызнаць усіх фігурантаў справы вінаватымі ва ўдзеле ў масавых беспарадках у ноч з 9 на 10 жніўня 2020 года і прызначыць усім пакаранне ў выглядзе пазбаўлення волі з адбываннем ва ўмовах узмоцненага рэжыму на наступныя тэрміны:
• Аляксандру Лопуху — на 5 гадоў і 6 месяцаў;
• Сяргею Цібцу, Валянціну Колбу, Андрэю Хвескаўцу — на 5 гадоў кожнаму;
• Леаніду Германовічу, Андрэю Мацуку, Аляксандру Шандыбе — на 4 гады і 6 месяцаў кожнаму;
• Сяргею Волку, Аляксандру Шаламіцкаму, Сяргею Шаламіцкаму — на 4 года кожнаму

Таксама Хвескаўца пазбавіць спецыяльнага звання — "малодшы сяржант унутранай службы".

Ніхто з абвінавачаных не прызнаў іскавыя патрабаванні пацярпелых і грамадзянскіх пазоўнікаў, акрамя Аляксандра Лопуха, які ўжо кампенсаваў пашкоджанне лаўкі. Адкрыць / каментаваць

2021-07-02 13:51:00 Гамельчуку запрасілі тры з паловай гады калоніі за «тры ўдары нагой» міліцыянту падчас аднаго з маршаў

24-гадовага Паўла Ларчыка вінавацяць у гвалце над міліцыянтам — інспектарам Чыгуначнага АУСу Паўлам Шапавалавым на Маршы пратэсту 20 верасня 2020 года. Згодна з абвінавачаннем, калі Шапавалаў затрымліваў Ларчыка, хлопец «нанёс тры ўдары нагой Шапавалаву — у апошняга былі крывападцёкі».

Падрабязнасці bit.ly/3hdQKac Адкрыць / каментаваць

2021-07-02 13:30:01 «10 чалавек у 2-меснай камеры з макрыцамі, кожнай раніцай — хлорка, днём — тры «шмона», два разы ў ноч — пералік жыхароў камеры». Якія ўмовы на «сутках» былі ў чэрвені

Анамальная спякота ў Беларусі стала выклікам для асуджаных па ўсёй Беларусі. З-за таго, што ізалятары і СІЗА перапоўненыя, у маленькіх камерах можа знаходзіцца адразу да 20 чалавек, дзе наўпрост няма чым дыхаць. На шпацыр ці ў душ арыштантаў амаль не выводзяць.

Дзяўчына, якая адбывала пакаранне ў чэрвені ў ІЧУ на Акрэсціна, СІЗА і ІЧУ ў Баранавічах, распавяла, як яна з сукамерніцамі змагалася са спякотай, сядзела ў карцары, дзе было дзевяць чалавек, пра жудасныя ўмовы ў баранавіцкім СІЗА, і як ім там давялося працаваць bit.ly/3h9pXfq

«На "сутках" са мной сядзелі дзяўчына-археолаг, яе сяброўка навуковец, журналістка «Нашай Ніва», барыстка, галоўная бухгалтарка, музыка, псіхолаг, інжынер і гандлярка» Адкрыць / каментаваць

2021-07-02 12:50:18 На журналіста канала «Настоящее время» Рамана Васюковіча склалі пратакол за працу без акрэдытацыі і сёння будуць судзіць

Журналіста вінавацяць за выхад у прамы эфір праграмы “Главное” 25 чэрвеня, піша @bajby

Сёння журналіста выклікалі ў Першамайскі РУУС Мінска, дзе апыталі з нагоды яго супрацоўніцтва з міжнародным тэлеканалам «Настоящее время». Таксама міліцыянты склалі адміністрацыйны пратакол за парушэнне парадку вырабу і распаўсюду прадукцыі СМІ (арт.23.5 КаАП). Адкрыць / каментаваць

2021-07-02 12:05:48 У ЗША ўвялі мараторый на сьмяротнае пакараньне на фэдэральным узроўні

Сьмяротнае пакараньне на фэдэральным узроўні было адменена ў ЗША ў 1972 годзе рашэньнем Вярхоўнага суду. Але ў 1988 годзе яно было часткова адноўленае, піша "Свабода"

ЗША — адзіная з заходніх краін, дзе да гэтага часу выковаюцца сьмяротныя прысуды. Сьмяротнае пакараньне практычна адменена ва ўсіх краінах Эўропы, акрамя Беларусі. Толькі за 2020 год на на сьмяротнае пакараньне ў Беларусі былі асуджаныя тры чалавекі.

Таксама ёсць непацверджаная інфармацыя, што ўжо ў 2021 годзе смяротны прысуд у дачыненні да Віктара Паўлава, хутчэй за ўсё, быў прыведзены ў выкананне. Адкрыць / каментаваць

2021-07-02 11:31:41 Стаялі ў счэпцы, але ў далоні не пляскалі. Вынесены прысуд мінчукам Якубоўскаму і Драбатовічу

Іх абвінавачвалі ў «арганізацыі альбо актыўным ўдзеле ў групавых дзеяннях, якія груба парушаюць грамадскі парадак» (арт. 342 КК РБ). Нібыта на акцыі 10 жніўня яны выходзілі на дарогу і стаялі ў счэпцы ў першым шэрагу.

Палітвязням прысудзілі па 3 гады «хатняй хіміі» і вызвалілі ў залі суда.

Акрамя таго, суд пастанавіў вярнуць Драбатовічу БЧБ-сцяг.

Падрабязнасці bit.ly/3AlieCE Адкрыць / каментаваць