Татарлар йөгерә!

2022-02-22 11:20:52 Остазым, мин ялкау түгел!
Кичә иртән кичкә кадәр зиратларда бөекләребезнең каберләрен тәртипкә китереп өйгә нык арып кайткан идем. Аннары остаз кушуы белән махсус күнегүләр ясадым. Бүген исә планда чакрымны 6 минутта үтү тизлеге белән 15 чакрым иде. Чыгасы килмәде, нык килмәде. Үз-үземне кулга алдым һәм башладым. Беренче 3-4 чакрым тирәсе шактый кыен иде, аякларның кичәгедән соң арыганлыгы сизелә иде. Көне буе зиратта
булып, җиңелчә кием белән өшегән идем. Өшегәнлек йөгергәндә сиздерде. Авыр булгач башыма төрле тискәре уйлар керә башлады. Әллә инде йөгермәскә, кайтып ятырга һ.б. Юк, ялкауланып ятып булмас, план куелган һәм аны ничек ерып чыгарга кирәк дидем. 5чакрым тирәсендә йөгерү кәефе дә керде, рәхәт тә була башлады, тизлек тә үзеннән үзе артты. Шулай кәефләнеп 13ләргә кадәр тырыштым, аннары киредән авыр була башлады. Шөкер, 15не тәмамладым. Адкрыць / каментаваць

2022-02-10 12:02:42 Күптән түгел уртача 5.16 тизлеге белән 12 чакрым йөгереп кайттым, гәрчә 5.30 белән йөгерергә кушылган булса да. Бер яктан, артыгын тырышып ташладым сыман. Икенче яктан, бүгенге йөгерү, дөресрәге аның беренче яртысы ничектер авыр булды. Әллә коронавирус белән авырып чыгу нәтиҗәсе, әллә һава торышы, әллә йөгерер алдыннан сөтсез кәһвә эчүем шунда, белмим. Өстәвенә, 2,5 чакрым тирәсе гел тауга күтәрелеш инде. Аның да йогынтысы булмый калмагандыр. Әмма сулыш җитмәде сыман, ничектер авыр иде: бармый гына инде менә. Шөкер, 6нчы чакрымнан соң хәлләр җиңеләйде, хәтта нык рәхәт вә ные
җиңел булып китте. Үзем сизмәстән тизлекне дә арттырып җибәргәнмен.
Шөкер, бүген дә ялкаулыкны җиңдем, һәм остазым кушылганны ерып чыга алдым. Адкрыць / каментаваць

2021-10-14 13:21:37 ТАТАР КЕШЕСЕ!
15 октябрь, 13.00 сәгатьтә, Тинчурин бакчасында (Татарстан урамы, 53нче йорт каршында)
ХӘТЕР КӨНЕ булачак!

Хәтер көне ул – матәм җыены (митингы). Җыен барышында 1552нче елда булган вакыйгалар, татар халкының авыр язмышы искә алына. Шулай ук бүгенге көндә милләтебезне борчыган мәсьәләләр күтәрелә: милли мәктәпләр ябылуы, милли университет булмавы һ.б. Җыенда милләтебезнең тарихына, бүгенгесе һәм киләчәгенә битараф булмаган җәмәгать эшлеклеләре, шагыйрь-язучылар, дин әһелләре, җырчылар һәм гади татарлар чыгыш ясый. Ахырда 1552нче елда шәһит киткәннәр рухына дога кылына. 1552нче елдан алып бүгенге көнгә кадәр төрле шартларда милләтебез өчен көрәшкән барлык татар уллары-кызларын хәтергә төшерү көне. Без ул көнне мәйданга җыелып, бабаларыбыз гомерләрен юкка гына фида кылмаганын күрсәтәбез.

Хөрмәтле милләттәшләр!
1552нче елның октябрендә татар дәүләтенең башкаласы Казанны яклап шәһит киткән каһарманнарны, яу кырында ятып калган бабаларыбызны искә алып, алар рухына бергәләп дога кылырга чакырабыз! Адкрыць / каментаваць

2021-10-09 10:02:25 Таулы йөгерүнең ләззәте вә тәме нәрсәдә? Авырлыгы нидән гыйбәрәт? Нинди хыял вә максатлар белән йөгерүчеләр тауларга йөгерә?
Таулы-урманлы йөгерү нәрсәсе белән меңләгән йөгерүчеләрне җәлеп итә?
Бу һәм башка сорауларга Татарлар йөгерә проектының ютуб каналындагы өр-яңа видеосыннан белергә була! Сез дә кереп карагыз әле!


Лайклар һәм язылуларыгызны, видео астында фикерләрегезне көтеп калам



Адкрыць / каментаваць

2021-06-07 08:58:57 Кичә Авша ярым марафонында катнашып кайттым әле. Әлеге ярыш Истанбулга якын булу сәбәпле һәм утрауны урап кайту мөмкинлеге, яңа тәҗрибә алу форсату белән үзенә тартты. Йөгерешкә кадәр берничә көн дәвамында болытлы һәм хәтта яңгырлы көннәр булса да, ярым марафон көнендә һава торышы йөгерүчеләргә үзе бер сынау әзерләде булып чыкты. Чара көндезге 11дә башланып киткәндә, шактый кыздыра иде. Мин гадәттә старт вакытында су эчмим, әмма кичә бу мөмкин түгел иде, чөнки башланганчы ук авызлар кипте. Ярыш үзе яхшы гына башланып китте, беренче 5 чакрым шактый җиңел, тиз һәм рәхәт үтелде. Болай булса ярым марафонны җиңел генә үтәчәкмен дип уйлап та куйдым хәтта. Әмма әлеге хыяллар инде 7-8 чакрымда чәлпәрәмәгә килде, чөнки серпантин сыманрак озын вә озак күтәрелеш башланды. Аның яртысыннан артыгын җәяү мендек, чөнки йөгерергә хәл калмады. 10нчы чакрымда ниһаять ризык бирделәр (моңарчы бары тик су гына иде). Ризык дигәнем туракланмаган алма булып чыкты. Минемчә йөгерү ярышлары өчен
алма шактый уңышсыз ризык, эчне тутыра, озак эшкәртелә һәм әллә ни файдасын да күрмәдем. Банан һәм апельсин булмаганга, 2-3 кисәк алма йотып, юлны дәвам иттем. Бөтен кызыгы ярым марафонның икенче яртысында көтеп торган. Кояш шактый кыздырганга, һавасы да хәтта кайнар иде. Асфальт үзе дә кызулык өстәп торды. Үз-үземне чүл уртасында йөгерәм дип хис иттем. 11нче чакрымнан соң хәлсезлек башланды, чөнки кояшта шактый изрәтте, чиләкләп тир акты, әйтерсең лә мунчадан чыктым гына. 12нче чакрымда музыкантлар бераз кәефне күтәрсә дә, алдагы 6 чакрым озын-озын, озак-озак күтәрелү булды. Әлеге күтәрелешләр инде бетмәс сыман тоелды. Тауларны ниһаять менеп җиткәндә һәм төшкәндә хәл тәмам калмаган иде. Соңгы чакрымнарны инде автоматта үттем сыман. Финишка гадәттәгечә Татарстан байрагы күтәреп килеп кердем. Шөкер, бу ярыш та үтелде. Авша ярым марафоны күпмедер катлаулы һәм авыр булса да, миңа ошады, чөнки бу бик мөһим тәҗрибә булды. Эсседә дә, таулы шартларда да йөгерергә өйрәнү бик мөһим. Киләчәктә җиңелрәк булачак. Адкрыць / каментаваць

2021-06-07 08:58:54 Адкрыць / каментаваць

2021-06-07 08:58:48 Адкрыць / каментаваць