Птицы "Аляпка"

2022-03-01 10:45:11 Шпакі (скворцы) ужо абвяшчаюць пра свой прылёт гучнай песняй.

Звярні ўвагу, у сваіх разнастайных песнях шпакі імітуюць іншых птушак, паўтараюць гукі, пошчак, свіст. Шпака клічуць цудоўным птушыным "перасмешнікам".

Яны выдатна імітуюць і іншыя гукі – рыпенне дзвярэй, трэск матора, мяўканне, крумканне жаб, брэх сабак.

Фота: Donatas Vidutis, Брэст; Phil Baum, unsplash.com. Адкрыць / каментаваць

2022-02-28 11:08:50 Ліса – усім вядомы драпежнік. Як яна палюе ўзімку? Колькі кіламетраў праходзіць за дзень? Колькі мышэй ёй трэба злавіць і колькі спроб для гэтага яна робіць? Дзе ліса спіць у халодную пару года? І як пры гэтым захоўвае цяпло?

Каб атрымаць адказы на гэтыя пытанні, прапануем паглядзець цікавае відэа Film Studio Aves.

Адкрыць / каментаваць

2022-02-26 16:53:54 1 сакавіка ў Беларусі выходзіць марка з птушкай 2022 года – белай сініцай. Яе выпускае Белпошта ў супрацоўніцтве з АПБ.

Белая сініца (белая лазоревка) – невялікая прыгожая пеўчая птушка, якая жыве ў нас толькі на Палессі.

Белыя сініцы канцэнтруюцца вакол Прыпяці і на яе прытоках, утвараючы тут ізаляваную папуляцыю. Від уключаны ў Чырвоную кнігу Беларусі, па апошніх ацэнках 2015 года ў нашай краіне ўсяго 500-800 пар белых сініц.

1 сакавіка на Галоўпаштамце ў Мінску адбудзецца спецыяльнае гашэнне на канверце "Першы дзень". Над маркамі працавалі мастак і арнітолаг Аляксандр Міцянін і дызайнер Марына Віткоўская.

Адпраў паштоўку з такой прыгожай маркай сваім сябрам і раскажы ім пра птушку года. #птушкагода Адкрыць / каментаваць

2022-02-25 17:58:45 Прыродаахоўная асацыяцыя "BirdLife International" – глабальная сям'я з больш чым 115 нацыянальнымі партнёрамі на ўсіх кантынентах, якія нясуць агульную місію па абароне і захаванні птушак і прыроды.

З 2005 года АПБ – нацыянальны партнёр BirdLife, і мы працуем дзеля дзікай прыроды Беларусі.

З 2019 года АПБ – сябра Кааліцыі Чыстая Балтыка, а з 2021 – глабальнай некамерцыйнай арганізацыі Wetlands International.

Лісты са словамі падтрымкі АПБ калегі з усяго свету адрасуюць вышэйшым службовым асобам Беларусі. Гэта ўжо дзясяткі краін: Аўстралія, Славенія, Германія, Расія, Балгарыя, Польшча, Ізраіль, Латвія, Швецыя, Італія, Іспанія, Бельгія, Чэхія, Ліван, Румынія, Ірландыя, Мальта, Вялікабрытанія, Славакія, Новая Зеландыя, Люксембург, Партугалія, Швейцарыя, Палау, Інданезія, Харватыя, Паўночная Македонія, Малайзія.

Шаноўныя калегі, мы глыбока кранутыя і ўдзячныя за падтрымку! Зроблена шмат, і мы спадзяёмся, што ў нас будзе магчымасць зрабіць разам яшчэ больш – на карысць дзікай прыроды.

Даніэля Розэнгрэна. Адкрыць / каментаваць

2022-02-23 18:30:16 Хтосьці прыляцеў ці яшчэ ляціць з выраю, а хтосьці і не злятаў!
Колькі вадаплаўных і каляводных птушак зімавала ў Беларусі? Каго з птушак было найбольш і якія цікавыя віды былі заўважаныя? Чытай на ptushki.org/news/712241.html.

Вялікі дзякуй усім удзельнікам улікаў!

На фота качка-свіцьва (свиязь), @ptu6ki. Адкрыць / каментаваць

2022-02-22 22:41:48 Глядзі, якія мілыя звяры сустракаюцца ў палескіх лясах! Гэта – соня-палчок.

Від нездарма так завецца – соня праводзіць у спячцы больш за паўгода. У астатні час звярок вельмі актыўны, спрытна сноўдае па галінах і можа рабіць вялікія – да 10 метраў – скачкі паміж дрэвамі!

Доўгі хвост дапамагае соні ў руху, бо “працуе” як процівага і руль. Аднак у выпадку атакі драпежніка соня, схопленая за хвост, можа пакінуць у зубах нападніка толькі пухнатую скурку, якая лёгка здымаецца з хваста, як панчоха.

Соня-палчок уладкоўвае гнёзды ў дуплах, радзей – пад паваленымі камлямі ці сярод каранёў дрэў. Вялікую долю рацыёну соні складаюць садавіна, ягады, арэхі.

У 2021 годзе 6 месцаў пражывання соні-палчка на Палессі перададзена пад ахову ў рамках праекта АПБ “Палессе – дзікая прырода без межаў”. Там, дзе жывуць гэтыя “чырванакніжныя” грызуны, забаронена высякаць пладова-ягадныя і арэхаплодныя кусты і дуплістыя дрэвы, апрацоўваць расліны хімікатамі. #wildpolesia

Фота Ігара Бышнёва. Адкрыць / каментаваць

2022-02-21 12:48:55 Расіца прамежкавая (росянка промежуточная) – рэдкая расліна, што сустракаецца на верхавых балотах. Там, дзе яна расце, глебы вельмі бедныя на мінералы, да таго ж карані ў расіцы развітыя слаба, таму яна амаль не здабывае пажыўных рэчываў звычайным для раслін спосабам. Затое атрымлівае іх па-іншаму – ловячы насякомых.

Расіца выдзяляе кропелькі цягучай клейкай вадкасці, якія блішчаць на сонцы і вабяць здабычу. Сеўшы на расліну, яна апынаецца ў пастцы: сок паралізуе яе. “Злавіўшы” насякомае, ліст расіцы згортваецца і выдзяляе рэчывы, падобныя да стрававальных ферментаў. Ператраўліванне доўжыцца некалькі дзён.

Расіца моцна залежыць ад воднага рэжыму. Там, дзе яна расце, забаронены асушальная меліярацыя і здабыча торфу. Два месцы ўзрастання расіцы прамежкавай перададзены пад ахову летась у рамках праекта “Палессе – дзікая прырода без межаў”. #wildpolesia

Фота Аляксандра Казуліна. Адкрыць / каментаваць

2022-02-20 12:46:57 У самца крыжадзюба-яловіка (клеста-еловика) не толькі незвычайная дзюба, але і фантастычная агністая афарбоўка.

Гэтыя птушкі вельмі любяць ласавацца шышкамі. Пабачыць іх можна ў хваёвых лясах або на елках у гарадах. У Беларусі на гнездаванні гэты від рэдкі, а вось на зімоўцы больш звычайны.

Адна з яркіх асаблівасцяў гэтых птушак – здольнасць гнездавацца ў любую пару года, нават узімку: абы было дастаткова ежы. Звычайна тэрмін адкладкі яек – сакавік-красавік, часам – студзень-люты, зрэдку – чэрвень-ліпень. Так, у Беларусі знаходзілі гнёзды крыжадзюба-яловіка з кладкамі ў лютым! Калі ўраджай насення елкі асабліва шчодры, гэтыя птушкі могуць адкласці яйкі і двойчы на год.

Гняздуюцца крыжадзюбы-яловікі ў хваёвых і змешаных лясах, часцей – у ельніках. Для пабудовы гнязда заўжды выбіраюць месца сярод густых галін, якія надзейна хаваюць птушыны дом ад снегу і дажджу. Гнездаванню папярэднічае перыяд актыўных спеваў з танцамі і заляцаннем.

Фота: Павел Сацута. Адкрыць / каментаваць

2022-02-19 11:53:49 Сябры, важная інфармацыя.
Вызначальнікаў птушак засталося зусім няшмат – каля 100 асобнікаў, тыражоў у агляднай будучыні дакладна больш не будзе! Калі ты яшчэ не паспеў набыць выданне, гэта апошні шанец.

У вызначальніку:
229 відаў птушак, якія найчасцей сустракаюцца ў Беларусі;
691 якасная і арыгінальная фатаграфія;
248 старонак;
інфармацыя пра статус, сезоннасць, месцы пражывання, адметныя прыкметы і галасы кожнага віду.

Дзе набыць?
На etno.by/tovari-dlya-jivotnih/opredelitel-ptic.html. Сябры АПБ атрымаюць зніжку 10%. Каб даведацца промакод на зніжку, напішы на пошту АПБ info@ptushki.org і адзнач свой нумар сяброўскай карткі.
На oz.by/books/more10991632.html
На tn.by/product/vyznachalnik-ptushak-opredelitel-ptic/
У Акадэмкнізе – Мінск, пр-т Незалежнасці, 72 akademkniga.by/katalog/estestvennye-nauki/biologiya/opredelitel-ptic.-znakomstvo-s-pticami-belarusi.html. Адкрыць / каментаваць

2022-02-18 18:38:27 Дзікая анлайн-лекцыя АПБ пра птушку 2022 года!
Хутчэй запісвайся ptushki.org/wildlecture, каб даведацца шмат цікавых фактаў з жыцця белай сініцы!

Вось толькі некалькі пытанняў, на якія адкажа арнітолаг Павел Пінчук:
Як сібірскі від апынуўся ў Беларусі?
Чаму белую сініцу клічуць “князёк”?
Як мы можам дапамагчы птушцы года?
Чаму белая сініца выбрала сваім домам у Беларусі Палессе, і толькі Палессе?

Сустракаемся анлайн у чацвер 24 лютага. Удзел бясплатны, але патрэбна рэгістрацыя – ptushki.org/wildlecture!

Фота Андрэя Шэўчыка. Адкрыць / каментаваць