Get Mystery Box with random crypto!

Posłuchaj, to do ciebie

Лагатып тэлеграм-канала posluchaj — Posłuchaj, to do ciebie P
Лагатып тэлеграм-канала posluchaj — Posłuchaj, to do ciebie
Адрас канала: @posluchaj
Катэгорыі: Музыка
мова: беларускі
Падпісчыкі: 243
Апісанне з канала

Канал Вячаслава Радзівонава пра польскую музыку

Ratings & Reviews

2.00

3 reviews

Reviews can be left only by registered users. All reviews are moderated by admins.

5 stars

0

4 stars

1

3 stars

0

2 stars

0

1 stars

2


Апошнія паведамленні

2022-12-24 11:31:55 Сёньня Вігілія, заўтра Сьвята Божага Нараджэньня, хутка Новы год — галоўныя зімовыя сьвяты цывілізаванага сьвету. Няважна дзе і як вы будзеце сьвяткаваць, у пэўны момант вам захочацца паслухаць сьвяточную музыку. Думаю, што Last Christmas і розныя Jingle Bells усім ужо надакучылі, таму прапаную замяніць іх зімовымі альбомамі Lady Pank. Я разумею, што я ўжо ўсіх задзяўбаў гэтым старпёрствам, але зараз даверцеся мне. «Гэта не калядкі, як іншыя артысты запісваюць перад сьвятамі, а проста песьні, якія адносяцца да Калядаў, кажуць пра духоўнасьць, простыя, але вельмі важныя пачуцьці і эмоцыі. Іншымі словамі, зьявы, якія, незалежна ад рэлігіі або веры, унівэрсальныя і зразумелыя кожнаму», — такі тэкст можна знайсьці ў прэс-рэлізе да аднаго з выданьняў альбому, і ён лепшым чынам характэрызуе Zimowe graffiti. Гэтыя песьні, сапраўды, цудоўна спалучаюцца з калядным настроем і новымі фарбамі раскрываюць талент Яна Барысевіча і Януша Панасевіча. Альбом выйшаў у 1996 годзе, а праз два дзесяцігодзьдзя музыкі зрабілі другую плытку з новымі творамі.

А бонусам нагадаю пра годны беларускі калядны альбом. Напярэдадні сьвяткаваньня прыходу новага стагодзьдзя зьявіўся супольны праект «Сьвяты вечар» — па сутнасьці, працяг «Народнага альбому» і прадвесьнік альбому «Я нарадзіўся тут». У ім прынялі ўдзел Лявон Вольскі, Вераніка Круглова, Зьміцер Вайцюшкевіч і іншыя нашыя зоркі. Яны прасьпявалі калядныя гімны, а таксама зрабілі ўласныя сьвяточныя кампазыцыі. Напрыклад, менавіта для гэтага праекту Аляксандр Памідораў запісаў сваю знакамітую «Цуд на Каляды». Карацей, дадавайце ў плэйліст. Праўда, знайсьці цяпер запісы даволі складана, таму пераходзьце на канал-рэквіем «222 альбомы беларускага року і ня толькі», дзе ёсьць і ўсе трэкі, і сканы буклета з тэкстамі песень.
134 views08:31
Адкрыць / каментаваць
2022-12-23 14:00:16 1. KARAŚ/ROGUCKI „Czułe kontyngenty”

Развал Coma для мяне стаў вялікай трагедыяй. Гэта адзін з улюбёных гуртоў не толькі ў Польшчы, а ўвогуле. Я толькі аднойчы патрапіў на іх выступ, і тое ў межах канцэрту Europejski Stadion Kultury. Цяпер вельмі шкадую, што не зьезьдзіў калісьці адмыслова на сольнік гурта. Не любіць голас Пятра Рагуцкага немачыгма, таму я рады, што ён працягнуў дзейнасьць у іншым праекце. Праўда, KARAŚ/ROGUCKI — гэта ўжо поп-музыка. Ніякіх цяжкіх гітар, пераважна электроніка. За яе як раз адказвае Якуб Карась, які раней граў у The Dumplings. Справа Рагуцкага — тэксты і вакал.

Першыя рэлізы мяне не зачапілі падаваліся надта простымі, але новы альбом выглядае больш разнакаляровым. Музыкі выкшталцона жанглююць настроямі, пераходзячы ад бесклапотных танцавальных нумароў у першай частцы рэліза („Bezpieczny lot”, „Latem pływam nago w czystej wodzie”, „Brunatny”) да рамантычнай лірыкі („Zobacz jak się pięknie pali”, „Film”), сканчаючы фактычна вяртаньнем Рагуцкага ў часы Coma з калярокавымі балядамі („Zapasowy tlen”, „Mniej niż więcej”, „Czułe kontyngenty”). Для мяне — №1 у 2022 годзе ў польскай музыцы!
147 views11:00
Адкрыць / каментаваць
2022-12-23 10:54:55 2. BOKKA „Blood Moon”

Музыку інды-гурта BOKKA у Польшчы часам параўноўваюць з Röyksopp ці Fever Ray, а голас вакалісткі з Björk. Спробы знайсьці нейкія падабенства робяцца не толькі з жаданьня апісаць творчасьць, але і праз тое, што трыа застаецца ананімным ужо дзевяць гадоў! Музыкі выступаюць у масках і нідзе не пазначаюць імёны. Некаторыя нават лічаць, што адным з удзельнікаў гурта зьяўляецца ўсюдыісны Давід Падсядла. На гэта намякае прадусаваньне новага альбома Даніэлям Вальчакам, які працаваў з Падсядлам. Гэта ўсё здагадкі, галоўнае, што музыка ў гурта вельмі годная. У свой час пра іх пісаў нават Pitchfork, а ў Польшчы BOKKA выступілі бадай на ўсіх буйных фэстах. Новы альбом „Blood Moon” — касмічна-псыхадэлічны па настроі і гуку з трансавым бітам, атмасфэрнымі сінтыпопавымі сынтызатарамі і гулкім раскацістым вакалам. Тут можа няма вялікіх гітоў, але ўсё разам слухаецца суцэльна, як вялікі канцэптуальны твор.
149 viewsedited  07:54
Адкрыць / каментаваць
2022-12-22 13:24:14 3. Żurkowski „KURZ”

Żurkowski — гурт вакаліста, гітарыста, кампазытара і аўтара песень Лукаша Журкоўскага. Не сутыкаўся зь ягонай творчасьцю да зьяўленьня „KURZ”, хоць гэта ўжо і другі альбом праекту. Сам Лукаш жыве больш за дзесяць гадоў у Вялікай Брытаніі, але сьпявае па-польску, а ў складзе гурта — толькі палякі. Музыкі граюць так званы альтэрнатыўны рок. Можна было б сказаць нават тыповы польскі рок, але адчуваецца ўплыў розных музычных плыняў і нейкі нетутэйшы вайб. Можна было б параўнаць Żurkowski з Ørganek, зь якім нават запісаны сумесны трэк на альбоме („Western”), але Żurkowski агулам гучыць нашмат больш разнайстайна: шмат клявішных, зьменаў тэмпу, запамінальных рыфаў. Альбом раскрываецца пад канец, калі ад радыё-фарматных песень Лукаш пераходзіць да прог-рокавых („ZBJ”) і псыхадэлічных элемэнтаў („Ostatni raz”), і калі зьяўляюцца адгалоскі іншых польскіх рок-зорак, накшталт Coma („Stoję sam”) ці Myslovitz („Wynik stresu”). Агулам атрымалася вельмі моцная і разнастайная праца, дзе ёсьць месца і стадыённага маштабу пога-гітам, і больш экспэрымэнтальным кампазыцыям.
160 views10:24
Адкрыць / каментаваць
2022-12-21 13:00:11 Працягваю падводзіць уласныя вынікі году ў польскай музыцы. На чарзе — наступны альбом.

4. Lochy i Smoki „Mog​ł​em zostać w domu i grać w gry”

Назва гэтага шчэцынскага панк-гурта перакладаецца проста як Dungeons and Dragons ці «Лёхі і цмокі». У беларускай мове «падзямельле» таксама можа быць «лёхам» ці нават «лёхай», калі глядзець слоўнік Крапівы. Але ня будзем паглыбляцца ў лінгівстыку — слухаем музыку.

Гэта такі дабротны панкешнік са скрымавым вакалам — адначасова вельмі мэлядычны і даволі агрэсыўны. Музыкі захапляюцца, як зразумела з назваў і гурта, і альбома, гульнямі, а таксама фантастыкай, фільмамі Лінча, музыкай Minor Threat і Blink 182… Карацей, усякімі такімі штукамі, характэрнымі для майго пакаленьня (кліп на песьню „Kosmiczne Przygody Galaktycznej Drużyny” толькі пацьвярджае гэта, ахаха). За дзесяць гадоў існаваньня яны выпусьцілі два альбомы, адыгралі шмат клюбных канцэртаў, але выступалі і на буйных фэстах, кшталту Jarocin Festival. Для шырокай аўдыторыі Lochy i Smoki амаль не вядомыя, а вось аматарам панка і рознага эмакора, такое мусіць спадабацца.
179 views10:00
Адкрыць / каментаваць
2022-12-19 13:54:24 Год сканчаецца, а значыць прыйшоў час абраць найлепшыя альбомы. Калі, так бы мовіць, у сусьветным маштабе мне вельмі спадабаліся сёлетнія рэлізы, то польская музыка, хутчэй, расчаравала. Летась быў цэлы россып шыкоўных альбомаў, якія надоўга застануцца ў мяне ў плэйлісьце, а ў гэтым хіба толькі на топ-5 назьбіраў. Праўда, паказвае практыка, што празь нейкі час трапяцца рэлізы, якія я проста своечасова не заўважыў і якія вартыя былі б быць у сьпісе лепшых, але гэта ўжо зусім іншая гісторыя. Таму, пачынаем.

5. sanah „UCZTA”

Пра Зузанну Юрчак я ўжо пісаў, таму моцна паўтарацца ня буду. Альбом „UCZTA” — адзін з найбольш пасьпяховых рэлізаў года па ўсіх паказчыках. Гэта якасная поп-музыка з добрым прадусаваньнем, запамінальнымі мэлёдыямі і прадуманымі аранжыроўкамі. Усе песьні на ім запісаныя сумесна зь іншымі польскімі выканаўцамі. Галоўны гіт — калябарацыя з Дар'яй Завялаў Eldorado. Танцавальная, але, кранальная па зьмесьце песьня — ода роднай (для sanah) і любімай (для Завялаў) Варшаве. Mokotowskie moje sny замест american dream — гэта крута! Іншы радыё-гіт — ostatnia nadzieja — яшчэ адна вельмі прыгожая і лірычная кампазыцыя ў мажорным ладзе, запісаная з галоўнай зоркай краіны Давідам Падсядлам. Варта паслухаць і паглынуцца і ў іншыя песьні. Напрыклад, Mamo tyś płakała інсьпіраваная творам «Прасьнічка» знакамітага беларускага і польскага паэта-рамантыка Яна Чачота, пакладзенага ў свой час на музыку выбітным беларускім і польскім кампазытарам Станіславам Манюшкам, а ў Tęsknię sobie, запісаную з Артурам Роекам, цытуецца адзін з галоўных рок-гімнаў Польшчы „Autobiografia” гурта Perfect. Карацей, на альбоме „UCZTA” дастаткова цікавых музычных момантаў і рэфрэнсаў. У топ-5 дакладна мусіць быць :)
217 views10:54
Адкрыць / каментаваць
2022-12-16 14:34:30 Сёньня пайду на канцэрт Lady Pank, прысьвечаны 40-годзьдзю дзейнасьці гурта. З гэтай нагоды ўзгадаў тэму, пра якую неяк пісаў у ціўцеры.

Шмат беларускай рок-музыкі 80-х была інсьпіравана польскай сцэнай, якая ў сваю чаргу захаплялася брытанскай новая хваляй. Гэта добра чутно асабліва на прыкладзе гурта «Бонда». І цікава часам знаходзіць новыя паралелі. У Lady Pank ёсьць песьня Sztuka latania, якая не ўвайшла на нумарныя альбомы, але ўсё адно стала супэр-гітом. Трэк быў выдадзены ў 1985 годзе, а ў 1986-м на верш Міхала Анемпадыстава «Бонды» запісала песьню «Да неба».

Гэтыя два творы не моцна падобныя музычна, і нават героі песень маюць розныя характары — у «Бонды» вар'ят-летуценьнік, а ў Lady Pank фаталіст-самагубца, — але яны абодва прагнулі неба і палёту. Прычым, мне здаецца, што зьявіліся песьні сапраўды паралельна. Часу паміж імі вельмі няшмат, а напісаць верш, зрабіць мэлёдыю, а, самае складанае, запісаць трэк тады ў СССР, так хутка было бы складана. Проста людзі жылі на адной хвалі, мелі той жа вайб.

Дарэчы, у 2018-м «Крама» аднавіла і перазапісала песьню «Да неба», прысьвяціўшы яе памяці Міхала Анемпадыстава. Студыйнага запісу онлайн не знайшоў (сам маю CD з тым сынглам і MP3, каму цікава), але можна паглядзець канцэртнае відэа.
264 views11:34
Адкрыць / каментаваць
2022-12-10 15:00:04 На тых выходных у Лодзі ўручылі прэмію PL Music Video Awards за найлепшыя кліпы 2022 году. Я паглядзеў усіх пераможцаў і абраў пяць найбольш цікавых, на маю думку, відэа для каналу @dzikpic. Паглядзіце і вы.
318 views12:00
Адкрыць / каментаваць
2022-12-07 12:48:18 Фэномэн Давіда Падсядла для мяне ня вельмі зразумелы. Ён, канешне, добры выканаўца і шоўмэн, але мяне не асабліва чапляе. Затое ў Польшчы ён галоўная зорка. Хуткасьць, зь якой распрадаюцца квіткі на канцэрты Падсядла, уражвае. Вось сёньня і заўтра ў яго два вялікіх выступы ў найбуйнейшай крытай зале Варшавы — у Палацы спорту Torwar. Квіткі былі прададзеныя даўно і імгненна. Як і на канцэрт 26 жніўня наступнага году (!) на стадыёне Narodowym (увогулей, найбуйнейшай пляцоўцы сталіцы). І вось чарговая навіна: у панядзелак за некалькі гадзін былі купленыя ўсе квіткі на канцэрты ў межах тура „Przed i po” ў 11 гарадах. Таму адразу ў кожным з іх дадалі яшчэ па адным канцэрце. У Сопаце музыка ўвогуле будзе граць тры дні запар. Проста нейкае вар'яцтва!

Старт продажаў квіткоў на дадатковыя выступы ўжо праз гадзіну. Можаце пасьпець.

Пакуль паслухайце новы альбом ці паглядзіце, як ужывую выглядаюць канцэрты Давіда. Але няблага, праўда?
427 viewsedited  09:48
Адкрыць / каментаваць
2022-12-05 10:42:26 Заглянем глыбей у рэйтынгі Spotify. Сэрвіс зрабіў плэйліст са 100 найбольш папулярнымі трэкамі ў Польшчы ў гэтым годзе. Цікава, што 8 з 10 трэкаў зьверху — калябарацыі. Сярод іх — адзіная ня польская песьня (Harry Styles са сваёй As It Was закрыў дзясятку) і па два трэкі з удзелам sanah і рэпера White 2115. Апошні ўваходзіць у склад суполкі SB Maffija, якая выпусьціла галоўны гіт году па вэрсыі Spotify — Lawenda. SB Maffija зьяўляецца часткай лэйблу SBM Label, а там ня толькі White 2115, але і ікона польскага рэпу Mata, а таксама іншыя хіп-хоп-зоркі. Праўда, ў мяне не атрымліваецца адрозьніць іх паміж сабой. Увогуле сучасны польскі рэп нічым, апроч мовы, не адрозьніваецца ад амэрыканскага ці, прасьці госпадзе, расейскага: падобныя біты, адолькавая падача, агульныя тэмы. Зразумела, я — не мэтавая аўдыторыя, але вы паслухайце хаця б тое, што ў топе, і распавядзіце ў камэнтарах: ці атрымалася запомніць хто ёсьць хто? :)

У топе выканаўцаў, у прынцыпе, усё тыя ж імёны: White 2115, sanah, Mata, SB Maffija, Oki, Young Igi, Bedoes 2115, Malik Montana, Żabson, Kukon. Гэты тэстастэронны рэп-трэп міжсабойчык, як бачыце, разбаўляе зноў толькі sanah. Вось хто малайчынка!
372 views07:42
Адкрыць / каментаваць