Лінейная (аг | рэг) рэсія

2022-08-31 19:17:10 #statistics

Леанардачка наш Дзі Капрыа разышоўся з чарговай 25-гадовай. Чым зрабіў унёсак у маю любімую візуалізацыю (карцінка першая).

Пытанне, якое ўсіх не пакідае - ці сапраўды ён прынцыпова не сустракаецца з жанчынамі, якім за 25. Зараз мы будзем на яго адказваць.

Адказваць будзем просценькай сімуляцыяй. Сфармуем выпадковую выбарку з 8 стартавых узростаў як у ягоных пасій (18 - 25 год), возьмем вось гэтае апытанне, адтуль возьмем 381 пару, якія разышліся, выпадкова возьмем 8 значэнняў працягласці іхніх стасункаў, складзём узросты і працягласці стасункаў. Паўторым мерапрыемства 100.000 разоў і падлічым, у якім працэнце выпадкаў усе стасункі скончыліся, калі пасіям было 25 ці менш.

Гэтая сімуляцыя базуецца на спрошчаных дапушчэннях. Па-першае, што дадзеныя звычайных людзей можна экстрапаляваць на зорак. Па-другое, што працягласць стасункаў не залежыць ад узросту і іншых сацыядэмаграфічных характарыстык. Гетэра і гома, хлопчыкі і дзяўчынкі - усё ў адной кучы. Гэтыя дапушэнні, канешне, занадта простыя. Каму хочацца ўгарэць і ўдасканаліць, вось код сімуляцыі.

Верагоднасць разысціся выпадковым чынам з 8 жанчынамі запар, пакуль ім 25 ці менш, калі ты нармальны чалавек - 3.37%. Верагоднасці для розных узростаў на другім графіку. Адкрыць / каментаваць

2022-08-29 19:11:49 #belarus

У сувязі з апошнімі навінамі, пакажу вам забаўную статыстыку з далёкага 2012.

Напэўна шмат хто чуў пра тое, што Беларусь некалькі год займала першае месца ў свеце па колькасці шэнгенаў на душу насельніцтва. У першай таблічцы гэта і бачна - гіганцкі адрыў ад суседзяў, да і ўсіх астатніх.

Мала хто ведае, што Беларусь пры гэтым трымала 4 месца ў свеце (з канца) па колькасці адмоваў у візах. Гэта другая табліца. Менш адмаўлялі толькі жыхарам Бахрэйна, Амана і Трынідада і Табага. Я праўда не ведаю, але падазраю, што там проста мала іх выдавалі - аля “залатыя візы” для шэйхаў.

Пры гэтым, большасць адмоваў беларусам была праз недахоп фінансавых сродкаў - 2351 выпадак у 2011. А праз фальшывыя дакументы - 2.

Гэта ўсё зараз не вельмі важна. Але важна ўмець складаць ідэнтычнасць з дробных фактаў. Факт у тым, што беларусы былі самымі цывілізаванымі з т.з. “трэціх краін” - акропалісы не грамілі, дакументы адказна рыхтавалі, арганізаванымі чэргамі вярталіся дадому. Чым, у тым ліку, еўрапейцы актыўна карысталіся ў сваіх эканамічных інтарэсах. Адкрыць / каментаваць

2022-08-25 17:25:50 #statistics #belarus

Чалавек тут паспрабаваў прыкінуць, колькі твітаў па-беларуску публікуецца ў дзень. Атрымалася каля 4.000. Метадалогія апісаная тут.

Колькі твітаў у дзень прыходзіцца на аднаго карыстальніка падлічыць складана, вельмі залежыць ад групы. Ёсць лічба ў 2.6 твітаў на дзень. 4.000/2.6 = 1538 унікальных беларускамоўных карыстальнікаў у дзень.

Пры гэтым, усяго ў краіне каля 147.000 карыстальнікаў твітэра. Гэта тыя, да каго можна дабрацца рэкламай, на думку твітэра. Але колькі ў гэтай лічбе канкрэтна актыўных, колькі піша кожны дзень і г.д. сказаць цяжка. Адкрыць / каментаваць

2022-08-22 19:23:51 #statistics #everyday

Падзялюся самым нечаканым кавалкам статыстычнай інфармацыі, пра які ведаю. Расцяжка перад фізічнай актыўнасцю не зніжае верагоднасць траўмы.

Звычайна спасылаюцца на 2 паперы. У першай, 2004 году, мета-аналіз 6 эксперыментаў на амерыканскіх футбалістах, вайскоўцах у трэнажорках і г.д. Ніякага эфекту ад расцяжкі.

У другой, 2014, мета-аналіз ужо большы - 25 даследаванняў, 26.610 удзельнікаў, 3.464 траўмы. Тут ужо і баскетбол, і футбол, чаго хош. Сілавыя трэніроўкі дапамагаюць зніжаць траўмы, практыкаванні на баланс і каардынацыю - дапамагаюць, расцяжка - зноў не дапамагае.

Як з гэтым жыць? Даволі проста. Я расцягваюся, бо мне падабаецца расцягвацца. Неверагодна. Расцягвацца таксама карысна, калі хочацца сабе лепшую расцяжку. Таксама неверагодна. Праблемы ўзнікаюць тады, калі па 20 хвілін дрыфтаваць па трэнажорцы на сваім масажным ролеры перад цяжкай станавай, у спадзяванні, што гэта ўратуе вашую спіну. Адкрыць / каментаваць

2022-08-19 16:55:29 Сябар гісторык зрабіў свой першы статыстычны прагноз. У мяне няма да чаго прыдрацца:

• Расейская імперыя была 196 гадоў (ад 1721 да 1917)
• Савок быў 69 гадоў (ад 1922 да 1991), тобок 35% ад тэрміну РІ
• Калі працягнуць трэнд, то пуцінская рашка павінна працягнуць 24 гады (ад 1999 да 2023)

Добрай усім пятніцы, кацяняты Адкрыць / каментаваць

2022-08-16 18:54:39 #belarus #statistics

Прынёс вам малавядомае (як мне падаецца) апытанне беларускай моладзі. Наколькі я ведаю, у яго быў спецыфічны рэкрутынг, могуць быць скосы ў бок моладзі больш актыўнай. Але пачытаць было цікава. Парачка вясёлых фактаў:

• Для прыхільнікаў улады дзеці з’яўляюцца непараўнальна большай каштоўнасцю, чым для праціўнікаў.
• Апазіцыйная моладзь хоча ў Балта-Чарнаморскі Саюз нават больш, чым у ЕС. Адкрыць / каментаваць

2022-08-03 20:43:59 #statistics #science

Мне па працы часта прыходзіцца чытаць артыкулы пра пра менструальныя цыклы, цяжарнасці ці авуляцыі. Часам натыкаюся на вясёлы трэш. Зараз пра адзін распавяду.

Аўтары паперы знайшлі, што ў 2012 у ЗША замужнія жанчыны ў авуляцыю часцей выбіралі Ромні, а незамужнія ў авуляцыю - Абаму. Тлумачылі яны гэта прыкладна так: для незамужніх у авуляцыю важна перадаць свае гены, таму яны выбіраюць больш сіметрычнага Абаму (больш сіметрыі - лепшыя гены). А замужнія абіраюць кансерватара Ромні, бо гэта ў іх ад шлюбу развіўся механізм, які ў авуляцыю робіць іх больш кансерватыўнымі і такім чынам спрыяе захаванню шлюба.

Душэўна. Давайце ўявім, што аўтары б атрымалі вынікі наадварот - незамужнія ў авуляцыю галасуюць за кансерватараў, замужнія ў авуляцыю - за лібералаў. Прыдумаць такой якасці “тлумачэнне” - 2 хвіліны: “незамужнія выбіраюць у авуляцыю кансерватараў, бо шукаюць больш маскулінных партнёраў, а замужнія галасуюць за лібералаў, бо цяжар сямейнага быту робіць усялякія ліберальныя каштоўнасці, у тым ліку - вольныя сексуальныя паводзіны, больш прывабнымі”. Ну ці прыдумайце свой варыянт. Прыдумляць іх можна хоць да ночы.

Я гэта да чаго. Ёсць шмат прычын лічыць, што гэтае даследаванне - шум. Калі паварочаць любы шум - па рознаму вызначаць фертыльнае акно, паглядзець не на шлюбы, а на заробак, ці лакацыю і г.д. - шум пачне складацца ў патэрны. Якія патэрны мы б там не пабачылі, мы б заўсёды здолелі прыдумаць ім тлумачэнне. Адкрыць / каментаваць