Супрацоўнік МУС на ўваходзе ў ПВТ са сваім «прад’явіце дакументы» — ілюстрацыя стану беларускага IT, што цяпер думае не пра адкрыццё ўніверсітэтаў, а пра тое, як з найменшымі стратамі перажыць палітычны шторм. На пошуку ворагаў сярод айцішнікаў рэакцыйныя сілы разлічваюць набраць палітычныя балы. Іх асноўны тэзіс агучаны вуснамі Андрэя Савіных: «Каб выйсці з палітычнага крызісу, трэба ліквідаваць дыспрапорцыі, якія да яго прывялі».
Існуе меркаванне, што калі народ у жніўні высыпаў на вуліцы, атачэнне не стала казаць Лукашэнку, што яго не прызнаюць усе слаі насельніцтва. На пытанне «хто гэтыя людзі?» дарадцы адказалі: «Іпэшнікі і айцішнікі».
Аргументы добра ляглі ў агульную канву выбудоўвання альтэрнатыўнай рэальнасці, згодна з якой прычына крызіса ў Беларусі — не падтасоўка выбараў, а змова ўсіх з усімі.
Беларускае ІТ праходзіць фазу дзяржаўнага тэрору з вялікімі стратамі, піша Арцём Гарбацэвіч.