2022-07-09 19:27:17
Кавалеўскі пра справу Карыны Пацёмкінай і агульную сітуацыю з легалізацыяй беларусаў ва Украіне: «Будзем змагацца»У сувязі з рашэннем аб прымусовай высылцы з Украіны грамадзянкі Беларусі Карыны Пацёмкінай прадстаўніцтвам Офіса Святланы Ціханоўскай у Кіеве гэтая праблема ўзнятая перад кіраўніцтвам Дзяржаўнай міграцыйнай службы, Міністэрства ўнутраных спраў, Упаўнаважаным па правах чалавека Украіны.
Адзначана неадэкватная інтэрпрэтацыя закона «Аб прававым статусе замежнікаў і асоб без грамадзянства» і зроблены заклік адмяніць несправядлівае рашэнне аб высылцы Карыны.
Сумесна з беларускімі і украінскімі праваабаронцамі будуць падрыхтаваныя прапановы да Вярхоўнай Рады аб зменах у заканадаўства Украіны, якія дазволяць абараніць правы беларусаў і выключыць падобныя сітуацыі ў будучым. Для бягучага этапа распрацоўваюцца алгарытмы па вырашэнні падобных сітуацый, якія можна будзе ўжываць індывідуальна. Неабходна нагадаць, што праблемы ў беларусаў, якія жывуць ва Украіне, з’явіліся на фоне агрэсіі Расеі, у якую Лукашэнка ўцягнуў нашую краіну. Такім чынам, менавіта яго незаконныя дзеянні сталі прычынай, па якой правы беларусаў па-за межамі Беларусі апынуліся пад ціскам.
«
Сапраўды, гэта становіцца штодзённай навіной, што беларусы ва Украіне, у тым ліку тыя, хто займаецца валанцёрскай дзейнасцю, каб дапамагчы Украіне здабыць перамогу, становяцца аб'ектамі несправядлівага ўжывання закона. Я размаўляў з Карынай Пацёмкінай. Яна настроена рашуча і будзе змагацца за адмену рашэння аб дэпартацыі. Таму любая падтрымка будзе неабходная. Важная публічнасць такіх выпадкаў і падтрымка з боку грамадскасці і афіцыйных структур Украіны. Трэба заклікаць да спынення практыкі высылкі, магчыма, праз мараторый і аўтаматычны працяг дзеяння ВНЖ, тэрмін якіх скончыўся падчас вайны. Патрэбныя адпаведныя змены ў заканадаўстве праз Вярхоўную Раду», — кажа прадстаўнік Офісу Ціханоўскай Валер Кавалеўскі.
Офіс Святланы Ціханоўскай працягне прыкладаць намаганні для таго, каб вырашаць міграцыйныя праблемы беларусаў за мяжой, у тым ліку, праз задзейнічанне еўрапейскіх структур.
1 view16:27